Premiu ba dala lima ne’ebé Jornal INDEPENDENTE hetan ne’e ba obra jornalistiku ho titlu “Iha istoria nia lalatak okos: Realidade moris sobrevivente ida’ ne’ebé hakerek husi Aquino Gomes.

Enkuantu Lafaek News manan premiu ba kategoria media online, no GMN TV ba kategoria televizaun.

Diretór Ezekutivu CNC, Hugo Maria Fernandes hatete, premiu ida ne'e espesikamente atu dedika ba jornalista sira ne'ebe mak kontinua halo obra ida kona-ba direitu humanu iha aspeitu oi-oin.

"Ulun ita nia Sauduzo sira halo servisu obra  jornalizmu ba direitu autoderminasaun, depois de ita ukun an ita iha komplexidade ida boot liu, ita nia konstituisaun hatur obrigasaun estadu nia atu halo ema nia direitu sira nakonu, edukasaun di'ak, saude di'ak no asesu ba buat hotu, ida ne'e direitu ba ema atu hetan," hatete nia liu husi diskursu iha ambitu atribuisaun premiu ba orgaun komunikasaun sira, iha CNC balide sabadu (13/12)

Nia hatutan premiu ne'e atu falun nafatin jornalista sira, atu haree profisaun ida agora ne'e, laos de'it atu hakerek jornal  no  kumpri editor sira nia demanda tenke halo kobertura, maibe tenke mai ho sentidu ida obra jornalistiku atu tulun ema atu hatene sira nia direitu.

"Entaun imi  hanesan jornalista imi nia kna'ar mak ida ne'e, no ida ne'e mak halo imi nia profisaun iha privileizu, la'os ema hotu iha privileizu atu bele lor-loron hasoru PR, PM, maibe jornalista sira iha previleziadu ida imi tenke orgullu ho privileizu hodi servi ema barak nia hakarak hodi lori ema ba moris dignu" Nia dehan.

Diretór ne’e mos, fiar Katak ho premiu refere bele motiva jornalista sira seluk katak, bainhira hakerek notisia ho vizaun ida katak halo hela servisu ida atu hakonu ema nia direitu prinsipal sira iha sira nia moris.

Iha fatin hanesan prezidente konsellu imprensa Timor-Leste,  António Cesar Mali, premiu ne'e ho intensaun atu enkoraja jornalist atu muda hanoin katak, gravador labele ba liu ema politiku sira.

"Jornalista sira ita nia gravador labele ba liu ema politika sira, ita tenke lori publikasaun ema lian laek  sira nia atu ema hotu bele direitu atu moris di'ak hanesan ema seluk, maibe sira nia lian ema la rona," katak nia.

António Cesar Mali, fiar Katak ho premiu ne'e, bele lori mensajem importante ba jornalista sira, atu dedika an ba paz no direitus umanus liu husi publikasaun sira.

Nune'e mos na'in ba premiu jornalizmu da paz Maria Gorete Joaquim,kategoria media imprime, Aquino Gomes,  hato'o agradese ba CNC, ne'ebe kada tinan sempre akompaña jornalista sira nia podutu ne'ebe publika iha media sira.

"Ha'u kontete tanba ita nia obra ne'ebe kada ves ita publika bele iha rekonesimetu husi parte relevante liu-liu CNC, ne'ebe kada tinan sempre halo avaliasaun ba produtu Jornalistiku sira ne'ebe media sira," nia dehan.

Aquino Gomes subliña, ligadu ho notisia ne'ebe nia hakerek, oinsa atu eleva ema lian laek sira moris lor-loron hodi parte relevante sira bele tau atensaun.

"Entaun  ha'u iha hanoin ida oinsa atu eleva ema ne'e nia moris lor-loron ne'ebe nia enfrenta, atu nune'e parte relevante sira bele tau atensaun ba ita nia komunidade sira ne'ebe dalaruma nia moris vulnerável iha sidade dili,entaun hau ho inisiativa rasik koko ba intervista ho nia liga nia moris," tenik nian

Nia hatete, kona-ba rekomendasaun sira ne'ebé mai husi parte relevante sira, PDHJ, CNC,KI no Casa Sivil prezidente da repúblika, ida ne'e hanesan motivasaun ida.

"Ha'u hanoin liafuan sira ne'e hanesan motivasaun atu motiva ita atu labele fokus de'it ba sira ne'ebe iha poder, maibe tenke prioritiza mos sira ne'ebe la iha poder atu ko'alia sai saida mak sira sente iha sira nia moris tomak," nia hakotu.

Hakarak lee notisias kompletu, asesu deit link e-Jornal INDEPENDENTE: https://digital.independente.tl. edisaun segunda (15/12/25).