Japaun Apoia Manta Rihun 5 ba Vitima Inundasaun Featured

By Camilio de Sousa Abril 11, 2021 1389
Embassadór Japaun ba Timor-Leste, Hirashima Shusaku, simbolikamente entrega manta ba Sekretario Estadu Protesaun Sivil (SEPS), Joaquim Gusmao, Domingu ohin, (11/4), iha Aeroportu Internasional Nikolau Lobato Dili. Foto Camilio de Sousa/Independente Embassadór Japaun ba Timor-Leste, Hirashima Shusaku, simbolikamente entrega manta ba Sekretario Estadu Protesaun Sivil (SEPS), Joaquim Gusmao, Domingu ohin, (11/4), iha Aeroportu Internasional Nikolau Lobato Dili. Foto Camilio de Sousa/Independente

DILI:Governu Japaun liuhusi Japaun Internasional Cooperation Agency (JICA) fó apoia manta rihun 5 ba Governu Timor-Leste hodi rejolve vitima husi inundasaun ne’ebé akontese iha loron 4 fulan-Abril 2021.

Mantan rihun 5 ne'e, too iha loron domingu (11/4), ho aluga aviaun husi Indonesia TRI- MG ASIA AIRLINES ho Marka BOEING B737-3007.

Embassadór Japaun ba Timor-Leste, Hirashima Shusaku hatete, Governu Japaun fó apoiu manta hamutuk rihun 5 (5,000) bazeia ba pedidu husi Guvernu Timor-Leste iha loron 8 fulan-Abril.

"Lori Governu Japaun nia naran ami hakarak hato'o kondelénsia porfundu ba familia vitima sira ne'ebé mate, lakon uma no uma estragus no rikeza seluk tan, no agredese mós ba Governu Timor-Leste tanba bainhira Japaun hetan dezastre boot no rai nakdoko iha tinan hirak liu ba Timor-Leste hatudu nia solidaridade no amizade ba Japaun liu-hosi doasaun ho montante dolar amerika milaun $1 no agora dadaun ne'e, ami nia tempu  hodi lolo liman atu ajuda ami nia belun sira,"dehan Hirashima iha Aeroportu Internasional Nicolau Lobato Comoro Dili, ba jornalista Online Independente, iha Domingo ne’e.

Nia hatutan, ohin loron Japaun apoiu de’it manta unidade rihun 5 ba vitima dezastre naturál maibé Governu Japaun iha ona planu atu oferese tan apoiu seluk iha tempu badak.

Iha fatin hanesan, Sekretario Estadu Protesaun Sivil (SEPS), Joaquim Gusmao fó agradesementu ba Governu Japaun liuhusi Embaixada Japaun no JICA ne'ebe responde ona Governu nia pedidu ho lalais.

"Manta sira ne'e ekipa konjunta sei distribui ba maluk vitima inundasaun sira ne’ebé naran iha ona dadus,"dehan nia.

Nune’e, SEPS mós informa ba populasaun no maluk sira ne'ebé vitima ba inundasaun atu pasensia no kalma hodi hein ajudus husi Internasional no Governu Timor-Leste, tanba apoiu sira ne’e sei to'o iha imi nia liman.

Nia informa, apoiu solidariedade internasional husi nasaun seluk mós sei mai Timor-Leste iha tempu besik.

Molok ne’e, SEPS relata dadus provizoriu katak vitima husi inundasun ema na’in 42 mak mate, uma 1000 resin mak estragus, uma 100 resin mak mota lori no rai hanehan no ema besik rihun 9 mak sai refujiadu iha fatin 18.

 

Jornalista: Camilio de Sousa

Editor: Jose Sarito Amaral

 

Rate this item
(0 votes)
Last modified on Segunda, 12 Abril 2021 07:14

Independente Digital TV