“Tinan ida ne’e, moras ne’ebé as iha Sentru Saúde Komoro mak moras respiratoriu, tanba situasaun iklima halo anin boot no mós rai rahun barak, moras ne’e laos daet deit ba labarik sira maibé ema boot sira mós afeitadu hotu. Labarik sira hetan moras ne’e tanba dala barak sira halimar rai rahun no han hahan arbiru, ho buat sira ne'e mak provoka moras sira ne'e atu kona ita,”dehan Mediku Jéral SSK, Milena do Rego, iha knar fatin, segunda ne’e (20/12).

Tuir nia, labarik sira ne’ebé hetan moras respiratoriu ne’e tanba dala barak sira halimar ho rai rahun no han hahan arbiru, nune’e hamosu moras refere.

Nia hatutan, aleinde, moras respiratoriu iha mós moras kulit ho diareia ne’ebé rejista as iha Sentru Saúde refere.

Nia haktuir, total moras respiratoriu hamutuk 36.896, moras kulit hamutuk 10.389 no moras diareia hamutuk 8.366.

“Ita atu halo prevensaun ba moras hirak ne'e, bainhira la'o tenki uza maskra, uza maskra ne’e laos ita haree deit ba moras Covid-19, maibé halo mós prevensaun ba moras sira seluk, ezemplo, ita lao uza maskara atu satan netik rai rahun no mós no hemu be barak, han hahan ida ne'ebé konten ho vitamina, ida ne'ebé bele fó nutrisaun diak ba ita nia isin lolon atu bele hasoru virus ne’ebé kona ita,” tenik nia.

Asistente Editor: Saturnina da Costa