Istória Movimentu Professor Portuguêz Pozitivu COVID-19 iha Likisá Featured

By Jacinto Xavier Abril 25, 2020 4048
Eskola portugues. Foto INDEPENDENTE/Jonio da Costa Eskola portugues. Foto INDEPENDENTE/Jonio da Costa

Likisá: Sasin na’in konta istória kona-ba movimentasaun professor Portuguêz sira durante iha eskola Kafé Likisá.

Tuir sasin konta katak professor Portuguêza a’in rua ne’ebé oras ne’e sai ona pozitivu ba Corona Virus (COVID-19), konsege hanorin labarik sira semana ida hafoin Ministériu Edukasaun hasai karta sirkular iha loron 23 fulan-Marsu hodi hapara atividade eskola nian, relasiona surtu COVID-19.

Entretantu professor Portuguêz ida seluk ne’ebé hetan positivu COVID-19 iha Portugal, halo kontaktu ho professor sira hotu no alunu sira iha aula bainhira aprejenta an nuudar professor foun.

Seguransa Eskola Kafé Likisá Marselino Vitor (45) hatete, Portuguêz ida ne’ebé pozitivu CIVID-19 no agora iha Portugal, to’o iha Likisá iha loron 10 fulan-Marsu, molok Ministériu Edukasaun deklara ferias.

Marselino konta, bainhira profesora ne’e mai, labarik sira barak forma simu nia ho dansa kultura, no tara tais, no nia konsege aprejenta aan ba professor Portuguêz no professor Timor-oan sira seluk.

“Professora ida agora iha Portugal Pozitivu Corona ne’e to’o, nia maluk professor sira seluk fó bemvindu ka’er liman, hakuak malu hanesan bain-bain,”dehan nia, iha Eskola Kafé Likisá, horisehik.

Seguransa ne’e haree, professora ne’e hela iha uma ida hamutuk ho nia maluk feto na’in tolu seluk ne’ebé mai uluk ona, no nia maluk na’in neen seluk aluga uma komunidade nian.

Professora ida foun ne’e seidauk hanorin labarik sira iha aula, maibé nia maluk sira seluk inklui na’in rua ne’ebé ohin loron pozitivu COVID-19 iha sala izolamentu Vera-Kruz ne’e kontinua hanorin labarik sira, semana ida hanesan ne’e.

Entertantu, professor sira ne’ebé hanorin iha ne’eba sidadaun Portuguêz na’in 10 hanesan ne’e, Timor-oan hamutuk na’in 10-resin, ne’e seidauk inklui ho estajiariu, no funsionariu seluk.

Professor sira ne’e bainhira sira hanorin hotu fila mai tama uma, sira la naran kontaktu ho ema, bainhira sira sai entaun ba de’it merkadu sosa modo, ba paseiu, no ba restorante de’it.

Antes ne’e, Portavoz SIJK, Dr. Rui Maria de Araujo hatete, Sub-grupu TL ne’ebé oras ne’e iha ne’e, sira to’o Timor iha loron 28 fulan-Fevereiru 2020, sub-grupu P iha Portugal to’o iha Timor iha loron 8 fulan-Marsu.

Sub-grupu P ida ne’ebé oras ne’e iha Portugal hatudu nia sintomas durante iha nia viajen fila ba Portugal iha loron 4 fulan-Abril hafoin halo izame laboratoriu iha loron 6 fulan-Abril, no hetan rezultadu pozitivu iha ne’eba.

Rate this item
(0 votes)

Independente Digital TV