Tuir Kordenador Forsa-Tarefa ba Prevensaun no Mitigasaun Surtu Covid-19, Rui Maria de Araújo informa, iha mós kazu inan isin-rua na’in ida, ho idade tinan 27 horisiek iha hemorajia, ka fakar-ran.
“Señora ida ne’e iha istória abortu, ho ida ne’e dala rua ona, nune’e horikalan (20/03) ekipa médika transfere ba Vera Cruz hodi halo intervesaun husi espesialista sira no oras ne’e dadaun kondisaun estável,” dehan nia liu husi telekonferensia iha CCD, (21/03).
Ho nune’e pasiente inan isin rua ne’e sei transfere hikas ba izolamentu Tasitolu.
Entretantu, kazu foun ba loron ohin 21 fulan marsu hamutuk na’in 55, kazu rekuperadu na’in 3 no kazu ativu iha sala izolamentu hamutuk na’in 206.
SIJK nafatin apelu ba populasaun sira atu nafatin pratika medidas sira hanesan tuir mai ne’e:
(a) Uza mascara,
(b) fase liman beibeik ho sabaun ka dezinfetante ruma,
(c) evita kose liman ba matan, inus ho ibun,
(d) wainhira kumprimenta malu, lapresiza ka’er liman, bensa-liman, rei-malu ka haku’ak malu,
(e) evita halibur malu barak,
(f) hamri’ik ka tur do’ok husi ema seluk, mínimu metru ida ho balun.
Aliende ne’e, SIJK nafatin apela ba populasaun ne’ebé saí husi Dili ba munisipiu sira seluk, entre loron 5 to’o loron 9 fulan marsu madrugada, molok serka sanitaria hahú tama iha vigor iha Dili, favor ida aprezenta-an ba autoridade saúde sira ne’ebé besik-liu, iha imi nia hela fatin, hodi bele hetan atendimentu.
Apela mós ba komunidade iha munisipiu sira hotu, bainhira hatene kona-ba ema ruma ne’ebé sai husi Dili molok serka sanitaria hahú iha Dili, halo favor informa hela autoridade sira atu bele halo atendimentu ba sira.
Apela ba populasaun Timor-Leste tomak, liu-liu iha Munisipiu Dili, Baucau ho Viqueque atu nafatin hakmatek, lalika sé tilun ba lia-anin ka rumores.
