Imunidade Vicente Guterres: PN La Simu Korrespondénsia Husi Tribunál Featured

By Jacinto Xavier Outubru 04, 2017 1859
Vicente Guterres Vicente Guterres

DILI: Tribunál Distritál Dili (TDD) haruka ona karta ba Parlamentu Nasionál (PN) iha loron 22 Setembru 2017, relasiona hasai imunidade deputadu Vicente Guterres hodi ba hataan iha Tribuna, maibé surat ne’e seidauk to’o iha meza PN.

Juiza prosesu ba kazu sosa karreta Parlamentu Nasionál, Zumiaty Freitas hateten, hasai ona karta foun ba Parlamentu Nasionál hodi bele altera imunidade deputadu Bankada CNRT, Vicente Guterres, hodi bele partisipa iha julgamentu.

Maski nune’e, Prezidente Parlamentu Nasionál, Aniceto Guterres, seidauk iha koñesimentu kona-ba karta husi órgaun judisiáriu relasiona ho imunidade deputadu Vicente Guterres nian.

“Ha’u seidauk simu karta ida husi Tribunál”, dehan nia, horisehik.

Iha fatin hanesan, Prezidente Bankada FRETILIN, Francisco Miranda Branco hateten, kuandu simu ona karta husi tribunál meza PN tenke despaxa mai iha komisaun relevante atu bele haree hodi halo pareser iha plenária hodi hasai imunidade.

“Órgaun soberania Estadu tenke kolabora malu, atu nune’e ita bele garante estabilidade no funsionamentu Estadu ne’e bele la’o di’ak”, dehan nia.

Branco mós garantia katak, kuandu karta imunidade husi Tribunál mai ona iha meza PN fiar katak Deputadu Vicente sei iha vontade tomak atu bele koopera hodi bele ba tuir prosesu julgamentu iha Tribunál.

 

Rate this item
(0 votes)

Independente Digital TV