Iha 28 Maiu 2025, hafoin prazu notifikasaun husi Autoridade Munisipiu Dili remata, ekipa husi Ministériu Obras Públikas tuun hodi sukat espasu ne’ebé restaurante ne’e okupa. Rezultadu hatudu katak fatin ne’e tama iha espasu públiku ne’ebé uza ba dalan la’o ain no valeta, ho naruk metru rua no luan metru 27.

Eufrasia lamenta ho desizaun ne’e no afirma katak rai ne’e rai privadu ne’ebé nia sosa desde 2001. Nia esplika katak iha 21 Maiu nia simu notifikasaun ho prazu loron neen atu hamamuk fatin, no iha 24 Maiu nia hato’o karta ba tribunal hodi kontesta.

“Sira fó notifikasaun iha loron neen, entaun ami iha direitu atu hato’o karta ba tribunal,” dehan nia ba jornalista sira iha Pantai Kelapa, Tersa (28/05/2025).

Nia hatete mós katak nu’udar sidadaun, nia prontu koopera ho governu, maibé se rai privadu, tenke iha indeminizasaun.

“Ne’e la’ós rai públiku, ne’e rai privadu. Bainhira hakarak sobu, tenke iha ganti rugi,” hateten nia.

Restaurante Cosette fó servisu ba joven Timor-oan hamutuk ema 26, ne’ebé simu salariu liu salariu mínimu. Nia alerta katak desizaun ne’e bele lori impaktu ba sira nia moris.

Iha Novembru 2025, hafoin prosesu naruk, Eufrasia deside hodi hamamuk Cosette. Agora, uma ne’ebé uluk sai fatin negosiu, husik hela de’it estrutura mamuk ne’ebé sei hamriik iha fatin refere.

Iha palku internasional

Maski hasoru dezafiu iha rai laran, Eufrasia Vieira kontinua lori naran Timor-Leste ba palku internasionál.

Iha 16 Fevereiru 2026, nia anunsia katak sei reprezenta nasaun iha kompetisaun Miss Planet International iha Kamboja.

“Hau hakarak fahe novidades ida ne’e ba imi hotu katak tinan ida ne’e ha’u sei reprezenta Timor-Leste iha pageant Miss Planet International 2026. Kontestasaun ne’e feto barak husi nasaun oioin sei tuir hotu. Eventu ne’e sei hala’o iha Kambodia, Marsu fulan oin,” Eufrasia hakerek, iha 16 Fevereiru.

Partisipasaun ida ne’e konsidera istóriku, tanba nia sai reprezentante dahuluk husi Timor-Leste iha eventu ne’e. Organizadór sira mós hatete katak Eufrasia lori perfil ne’ebé kreativu no global, ho esperiénsia iha área design moda no edukasaun internasionál.

“Timor Leste will be represented for the first time by Eufrasia Vieira at the Miss Planet International pageant to be held at the Koh Pich Theater on March 15th, 2026 in the Kingdom of Cambodia,” hakerek ASEAN Beauty Pageant iha ninia pajina media sosial, iha 14 Fevereiru.

Mundu elojia

Eufrasia konsege hetan rekonesimentu boot iha nivel mundiál, liu husi titulu Miss Planet International Ambassador 2025 no mós Miss Social Media.

Nia prestasaun ne’e marka momentu istóriku ba Timor-Leste iha kontestu pageant internasionál.

Iha serimónia final iha 15 Marsu 2026 iha Kamboja, nia mós tama iha Top 20 no konsege hetan Top 10 husi partisipante husi nasaun 31.

“Eufrasia Vieira manan Embaixadora Miss Planet International iha Miss Planet International 2025. Nia mós manán prémiu Miss Media Sosiál,” hakerek ASEAN Beauty Pageant iha ninia pajina media sosial.

Prestasaun estraordináriu ne’e marka Timor-Leste nia koroa konkursu internasionál dahuluk ne’ebé istóriku, hodi halo nasaun tomak orgullu.

“Ita-boot nia grasa, forsa, no determinasaun hatuur Timor-Leste iha mapa konkursu globál ba dala uluk. Vitória ida ne’e la’ós imi nian de’it maibé selebrasaun ida ba Timor-oan idaidak ne’ebé mehi atu haree sira-nia rain nabilan iha palku internasionál,” pajina ne’e hakerek.

Eventu Miss Planet International ne’e promove Objetivu Dezenvolvimentu Sustentável, ho foku ba mudansa sosiál no protesaun ambientál.

Governu apresia

Governu liu husi Ministériu Juventude, Desportu, Arte no Kultura (MJDAK) apresia Eufrasia ninia esforsu.

Ministru Nelyo Isaac Sarmento hatete, nia orgullu ba kontribuisaun ne’ebé Eufrasia halo hodi reprezenta Timor-Leste iha mundu.

"Ita agradese ba sidadaun see de'it mak reprezenta naran Timor-Leste ba iha rai li'ur, ne'e ita orgullu. Ita la haree ba nia background, maibé ita hakarak oinsá ita reprezenta Timor-Leste ba ema nia rain, tanba ita tama ona ba ASEAN no CPLP, ida ne'e di'ak no merese atu ba aprezenta iha ema-nia rain," dehan Ministru Nelyo iha Komoro, Tersa (17/03).

Ironia ida

Istória Eufrasia Vieira nian sai hanesan kontraste entre prestasaun no realidade. Iha tempu ida, nia hetan aplausu no koroa iha palku internasionál; iha sorin seluk, nia hasoru despeju no lakon negosiu iha nia rai rasik.

Ironia ida ne’e la’ós deit kona-ba ema ida, maibé mós reflete dezafiu entre dezenvolvimentu urbanu, direitu propriedade no valorizasaun ba sidadaun sira ne’ebé kontribui ba imajen nasaun iha mundu.