Sexta, 17 Setembru 2021 | Login
×

Erro

An error occured during data fetch from google.com: Error calling GET https://www.googleapis.com/analytics/v3/data/ga?ids=ga%3A138150919&start-date=2017-01-15&end-date=2021-09-15&metrics=ga%3Avisits&dimensions=ga%3Ayear&start-index=1&max-results=1000: (403) Quota exceeded for quota metric 'Queries' and limit 'Queries per day' of service 'analytics.googleapis.com' for consumer 'project_number:402577812915'.
Publikasaun edisaun primeiru, iha lansamentu jornal INDEPENDENTE, loron 4 fulan-Abril 2011. Publikasaun edisaun primeiru, iha lansamentu jornal INDEPENDENTE, loron 4 fulan-Abril 2011.

Hanoin La Hanesan, Observasaun Horta-KI ba Ezisténsia Jornal INDEPENDENTE Tinan 10 Featured

DILI: Iha 4 Abril 2021, jornal INDEPENDENTE selebra nia aniversariu ba tinan 10. Iha esforsu lubuk ida ne’ebé ekipa tomak jornal ne’e halo hodi bele hetan konfiansa husi públiku. Maske hasoru dezafiu oioin, maibé jornal ne’e kontinua hamriik hodi hatutan lia husi sira ne’ebé lian laek.

Maske nune’e, esforsu hirak ne’e hamosu deferensia hanoin liuhusi sira nia observasaun, hanesan espresaun husi eis Prezidente Repúblika no Laureadu Nobel da Paz José Manuel Ramos Horta, Presidente Konsellu Imprensa, Virgilio Guterres no sosiedade balun.

Tuir Horta, durante ne’e jornal INDEPENDENTE dala-barak hato’o lia bosok no inventa informasaun ne’ebé públika.

“Parabéns Jornál INDEPENDENTE, maske dala-barak imi bosok, imi inventa tun-sa’ee, maibé parabéns. Hakuak boot ba fundadór, Direitór, Xefe Redasaun, jornalista sira hotu-hotu,” dehan Horta hafoin hasoru-malu ho Prezidente Repúblika Francisco Guterres Lú Olo, iha palasiu prezidensial Bairo-pite, Kuarta (31/03).

Entretantu Prezidente Konsellu Imprensa Timor-Leste Virgilio Guterres da Silva nia observasaun la hanesan ho eis Presidente Horta.

Presidente KI ne’e hato’o parabéns ba Jornal INDEPENDENTE.

Tuir nia, jornal INDEPENDENTE koñesidu no hetan premiu ba ninia prestasaun nu’udar instituisaun mídia ne’ebé di’ak no halo jestaun di’ak liu, trata ninia jornalista sira ho di’ak.

Virgilio espera husi tinan 10 ba oin sei kontinua mantein kualidade ne’e no haree mós ba kualidade produtu jurnalizmu nian.

“Primeiru ha’u hakarak lori naran pessoal no lori Konsellu Imprensa nia naran hato’o parabéns ba Jornal INDEPENDENTE ne’ebé halo tinan 10, ha’u hanoin tinan 10 ne’e periodu ne’ebé naruk ho esperiensia naton, ita hein katak jornal INDEPENDENTE kontinua sai hanesan opsaun preferivel ba futuru, katak INDEPENDENTE sei sai hanesan públiku ninia preferensia atu hetan informasaun ne’ebé loloos, dala ida tan parabéns, tinan naruk ba Jornal INDEPENDENTE,” dehan Virgilio via Telefone, Tersa (30/03).

Tuir nia observasaun, durante ninia ezistensia Jornal INDEPENDENTE sai hanesan opsaun foun ba públiku, tanba fofoun iha Timor Post, STL, no Jornal INDEPENDENTE mosu ho ninia kór rasik, ho karater rasik ne’ebé halo públiku barak haree INDEPENDENTE hanesan preferensia.

“Depois mai ho siensivu foun ka moris foun, entaun ida ne’e sai hanesan buat ida atrai públiku, ho titlu notisia ne’ebé aprosimasaun seluk, ida ne’e sai preferensia foun,” katak nia.

Tuir nia, Jornal INDEPENDENTE la’os mai ho naran Jornal INDEPENDENTE de’it, maibé ninia karakter rasik hamrik ho independente ne’ebé diferensia ho mídia sira seluk.

Iha fatin ketak lee-nain ida, João Araujo hato’o parabéns ba Jornal INDEPENDENTE ne’ebé oferese informasaun ba públiku durante tinan 10 nia laran.

“Ha’u fó parabéns ba jornal INDEPENDENTE ninia ezistensia tinan 10 ho ninia produtu ne’ebé di’ak. Ha’u la lee jornal lorloron maibé ha’u soe tempu oras ida rua lee, mais haree katak jornal INDEPENDENTE diferensia tebes ho jornal sira seluk. Ami mós husu atu mantein nafatin hodi fahe informasaun ne’ebé loos ba ita-nia públiku,” dehan João iha Jardin 5 de Maio, Tersa (30/03).

Iha fatin ketak, Diretór Ezekutivu Luta Hamutuk (LH) José Alves da Costa kongratula ekipa tomak jornal INDEPENDENTE.

“Ami fó esperensa boot ba jornál ida ne’e atu sai media ne’ebé edukativu hodi promove lia loos ba ita-nia povu no ba lee-nain sira no mós sai media ne’ebé kritiku,” dehan José via telefone Kuarta (31/03).

Nia espera jornal INDEPENDENTE sei kontinua sai lian ba lian-laek sira no sai mata-dalan ba lia-loos.

KSI-AJAR husu Labele Halis

Organizasaun Kadalak Sulimutuk Institutu (KSI) ho Asia Justice And Rights (AJAR) husu Jornál INDEPENDENTE atu hametin liu tan profesionalizmu, indepedensia no labele sai fali midia ne’ebé halis ba parte balun.

“Jornál INDEPENDENTE ba tinan 10 ne’e idade ida ne’ebé la’os kiik, ne’e komesa boot ba daudauk, ha’u hein katak imi bele hametin liu tan imi-nia profisionalizmu no mós imi-nia indepedénsia, labele sai fali mídia ne’ebé hanesan halis fali ba parte balun," dehan Diretór Ezekutivu AJAR, José Luis Olveira iha nia kna’ar fatin, Faról, Kinta (01/04).

Iha fatin ketak, Diretór Ezekutivu Kadalak Sulimutuk Institutu (KSI) Jenito Santana fó parabens ba jornál INDEPENDENTE ne’ebé durante ne’e ninia ezistensia hatudu ninia kredibilidade.

“Ha’u hanoin durante ne’e akompaña lee notísia INDEPENDENTE ninian notísia sira ne’ebé kredibel tebe-tebes. Espera katak ba oin sai jornál ida ne’ebé susesu ba ita-boot sira ninia vizaun ba jornál ne’e ninian atu habelar informasaun ba públiku no kontinua hametin ita-boot sira-nia kredibel hanesan jornál ida ne’ebé iha duni integridade, kredibel, akuntabilidade ba informasaun ne’ebé atual no faktual kontinua la’o ba oin, no dala ida tan parabéns Jornál INDEPENDENTE, forsa nafatin,” hatete nia.

Maukoli husu Mantein Kredibilidade

Vise Ministru Saúde (MdS) Bonifasio Maukoli hato'o parabéns ba Jornál INDEPENDENTE no husu atu Jornál INDEPENDENTE kontinua asegura kredibilidade informasaun ne’ebé públika.

" Ha’u hakarak hato'o parabéns ba iha Jornal INDEPENDENTE ne’ebé Ministériu Saúde mós hola parte sai hanesan parseiru, iha ne’e ita-boot sira-nia notisia di’ak no kredivel bainhira lee," dehan Maukoli iha Kampung Alor, Kinta (01/04).

Tuir nia, importante atu asegura nafatin no hatuur notisia ho loloos, kredivel no fahe ba ema hotu atu bele akompaña, liu-liu atividade sira ligadu ho Ministériu Saúde, nunee ema hotu bele akompaña.

 

 

 

Read 507 times
Rate this item
(1 Vote)