Jogu voleiból mista, Cabo-Verde reprezenta jogador husi Denzel Ramos ho numeru kamizola 1, no Catarina Fonseca ho numeru kamizola 3, enkuantu Mozambique reprezenta husi Alaima Ama Mahumane ho numeru kamizola 1, no Arnoldo Nhantumbo Clara Lima ho numeru kamizola 2.
Ínisiu jogu, Cabo verde hatudu kedas sira nia forsa hodi hadau pontu no la fo oportunidada ba Mozambique. Maske Mozambique koko uza estratejia oi-oin, maibé Cabo-verde kontinua domina, nune'e manan iha jogu set dahuluk ho pontu 22-17.
Hakat ba set daruak, ekipa rua mai ho estratejia ne'ebé hanesan, hodi halo lansa atake ho estratejia neebé-sira iha, hodi hadau pontu, maibé Cabo-Verde nafatin hadau pontu no manán set daruak ho pontu 22 no Mozambique 20.
Jogadór Mozambique, Arnoldo Nhantumbo Clara Lima hatete, sira la iha konsentarasaun no ladun iha preparasaun di'ak ba jogu nee.
“Ha'u hanoin ami laiha konsentrasaun, no mos ami la preparadu 100% ba jogu ida-ne'e, maibé ami hanoin katak ida-ne'e sei sai fásil uituan, maibé la'e,” Dehan nia, ba jornalista sira, iha kampu voleiból praia Lecidere, Kinta (24/07).
Nia dehan, kona ba organizasaun CPLP iha Timor Leste, nia hanoin ida ne'e hanesan kampionatu ne'ebé organizadu ho di'ak.
“Ha'u hanoin katak ida-ne'e kampionatu ida ne'ebé organizadu ho di'ak, no kampionatu voleiból ida ne'ebé exelente,” Nia informa.
iha fatin hamesan, Jogadora Cabo Verde, Catarina Fonseca informa, vitoria ne'e signifikadu ida ne'ebé boot tebes ba Cabo-Verde.
“Ha'u sente kma'an liu, tanba husi inísiu, ami nia ekipa nia operasaun sira importante tebes, tanba sira mós ekipa ne'ebé di'ak, entaun ba ami atu manán terseiru lugar, ida-nee signifika buat barak ba ha'u,” Nia relata.
Nia dehan, hasoru Portugál ne'e presaun maka'as liu, tanba sira iha esperiénsia barak liu duké adversáriu seluk.
“Sira iha esperiénsia barak liu duké ami, maibé ami iha korajen no dedikasaun barak iha kampu, tanba ne'e mak ami to'o antes, hau hanoin ida ne'e maka serbisu ekipa nian, tanba se ida-ne'e iha de'it ema balun iha kampu, sei nunka iha dalan atu joga jogu futeból ida,” Nia informa.
Nia salienta, vitoria ne'e hanesan supreza ida, maibe rezultadu ida ne'e mak hein hela, tanba esforsu sira hotu hodi dedika aan ba nasaun.