koordenadór REBAS-TL Joaquim Freitas Belo hatete, Governu liu-husi Minstériu Saúde tenke rejista ona dadus kona-ba ema mate iha TL, atu nune’e bele hatene kona-ba kauza lolos husi mate ne’e.
Tanba, nia parte sempre husu, MS no ministériu relevante katak presiza rekolla dadus ema mate nia kada tinan, atu nune'e bele hatene mate ne’e kauza husi moras saida, mate ho idade hira no munisípiu ida ne'ebé mak barak liu, atu nune'e governu bele iha dadus konkretu hodi halo planu.
“Ha’u sempre hatete, MS hamutuk ho ministériu relevante atu rekolla dadus ema tinan-tinan par hatene ita-nia ema ne’e mate ba moras saída, mate ho idade hira no munisípiu ne’ebé mak barak liu, para governu iha dadus konkretu ida hodi halo planu intervensaun, se ita la halo ida ne’e ita lahatene problema saida mak ita-nia ema mate barak,” dehan Koordenadór iha Ótel Timor Kolmera, Segunda (11/03).
Nia fó ezemplu, iha TL sai nafatin nasaun ida ne'ebé moras tuberkulose (TB) aas liu iha Sudeste Asiátiku kuaze kada tinan ida ema rihun ida atus haat resin (1.400) mak mate.
Nia dehan, ida ne'e foin mak ba moras ida seidauk aumenta tan moras seluk.
“ezemplu ha’u fó moras ida de’it, moras TBC, TL nafatin sai nasaun ida ne’ebé mak moras TB ne’e aas liu iha nasaun Sudeste Asiátiku, kuaze kada tinan ida ema 1400 mak mate kada tinan, ne’e foin moras ida de’it seidauk ba moras sira seluk,” dehan Joaquin.
Nia esplika, governu loke semiteriu públiku barak maibé semiteriu hirak ne'e to'o tinan rua ka tolu ema hakoi nakonu ona tan ne’e, Rede Ba Saude Timor-Leste konsidera indikadór ne'e ladi'ak.
Iha fatin hanesan, Reprezentante Ministeriu Saúde, Xefe Departamentu Parseria no Kooperasaun Saúde, Adelia Maria Moniz Barreto, hatete, MS enkoraza Ministeriu Administrasaun Estatal (MAE) atu husu ba xefe aldeia no xefe bairo sira, atu rekolla mós dadus, tanba ema balun mate la’os iha fasilidade saúde sira de’it.
“Ha’u nafatin enkoraza atu ita servisu hamutuk, ita mos bele konvida intituisaun Ministeriu Administrasau Estatal (MAE) atu husu ba sira-nia xefi aldeia no xefe bairo sira atu bele kolleta mós dadus ida ne’e, tanba ita-nia maluk ne’ebé mate la’os iha fasilidade saúde ne’e MS la kolleta dadus,” nia hakotu.