Desizaun ne’e Governu hafoin halo análiza ba pontu situasaun ba prosesu  reforma jestaun rekursus umanus iha administrasaun públika, ne’ebé aprezenta husi Prezidente Komisaun Funsaun Públika, Agostinho Letêncio de Deus.

Nune’e, Konsellu Ministrus deside hodi aprova suspensaun temporária ba rekrutamentu funsionárius públiku foun, ho objetivu atu garante jestaun rekursus umanus Estadu nian ne’ebé efisiente no sustentável liután.

"Medida ne'e halo hanesan parte ida husi preparasaun ba propostas estruturais ne'ebé lidera husi Grupu Traballu ba Reforma Jestaun Rekursus Umanus iha Administrasaun Públika, ne'ebé inklui, entre komponente seluk, define númeru ideál husi forsa traballu, kria paradigma foun ida ba sistema karreira iha Administrasaun Públika,"dehan Komunikadu ne'ebé Online INDEPENDENTE asesu iha Pájina Governu Timor-Leste, Kuarta (06/05).

Iha komunikadu ne’e haktuir tan katak, suspensaun ne’ebé daudaun ne’e aprova, aplika ba prosesu ingresu funsionárius públiku foun, maibé la inklui prosesu selesaun tuir méritu ba kargu diresaun no xefia no funsionáriu sira ne’ebé hala’o funsaun ho karakter espesiál, inklui rekrutamentu ba ajentes administrasaun públika.

Nune’e, hanesan prioridade, instituisaun sira tenke adopta mekanizmu mobilidade interna hodi hatán ba nesesidade pesoál nian, liu husi serbisu hamutuk ho Komisaun Funsaun Públika.

Entretantu, medida ida ne’e sei mantein durante períodu ne’ebé nesesáriu hodi análiza dimensaun ideál funsaun públika nian no hodi aprezenta paradigma foun ida ba sistema karreira iha administrasaun públika.