Governu Lansa Ona Pagamentu Ba Programa Bolsa da Mãe Jerasaun Foun Featured

By Jullu 23, 2022 505
PM Taur Matan Ruak entrega konta bankaria ba benifisiariu BdM-JF, iha Munisipiu Ainaro. Foto:Media Gab. MSSI. PM Taur Matan Ruak entrega konta bankaria ba benifisiariu BdM-JF, iha Munisipiu Ainaro. Foto:Media Gab. MSSI.

DILI: Governu liu husi Primeiru Ministru, Taur Matan Ruak hamutuk ho Ministra Saúde, Odete Freitas Belo no Vise-Ministra Solidariedade Sosiál no Inkluzaun, Signi Verdial, Sekretáriu Estadu Komunikasaun Sosiál, Mericio Juvinal Akara inklui Parseirus Dezenvolvimentu sira, sesta horseik (22/07), ofisialmente lansa ona pagamentu ba programa Bolsa da Mãe-Jerasaun Foun, iha Munisipiu Ainaro.

Tuir Primeiru Ministru Taur Matan Ruak, hatete, Governu tenke investe ba labarik sira hahú husi inan nia kanotak, nune’e sira bele hetan nutrisaun ne’ebé di’ak bainhira sira moris.

PM dehan, esforsu ida ne’e la’os governu mesak maibé servisu hamutuk ho parseirus nasionais no internasionais.

“MSSI no Ministériu Saúde hili Munisípiu Ainaro hodi lansa programa BdM-JF, tanba Munisípiu Ainaro iha númeru mal nutrisaun ne’ebé a’as,”dehan nia iha Komunikadu ne’ebé Online INDEPENDENTE asesu iha pajina ofisial MSSI, sabado ne’e (23/04).

Enkuantu, PM haktuir, programa ida ne’e tenke benefisia ba ema sira ne’ebé merese duni atu hetan.

Ho nune’e, objetivu husi programa ida ne’e mak, atu hamenus pobreza, kombate má nutrisaun, inklui redús ra’es badak no haburas ekonomia ba ema hotu no mós enkoraza inan sira atu labele falta ba iha klinika sira.

Tanba ne’e, PM mós husu ba autoridades no komunidade sira atu koopera ho MSSI no Ministériu Saúde hodi garante programa ne’e ninia implementasaun.

“parabéns ba komunidade Ainaro, MSSI no Ministériu Saúde inklui parseiru dezenvolvimentu sira ne’ebé tau forsa no rekursu hamutuk hodi tau matan ba labarik feto sira, liu-liu ita nia oan sira no tau matan ba oan sira ne’e, imi tau matan ba futuru Timor nian,”tenik PM.

Iha fatin hanesan, Vise-Ministra MSSI, Signi Verdial, hateten, Governu halo uluk pagamentu ba benifisiariu sira ne’ebé dokumentus kompletu ona.

"Ohin ita halo lansamentu ba pagamentu programa BdM-JF, signifika benefisiáriu hirak ne’ebé rejista ho dokumentus ne’ebé mak kompletu iha Munisípiu Ainaro, Bobonaro inklui RAEOA, hahú simu ona sira nia direitu, liu-liu inan isin rua no ba labarik sira ne’ebé mak moris husi fulan Janeiru 2019 mai oin,"dehan Vise-MSSI.

Enkuantu, benefisiária husi Suku, Soro Postu Administrativu Ainaro Vila, Anabela da Conceição da Silva, senti kontente tanba ho subsídiu ida ne’e nia bele hadia ona hahan nutritivu ba nia oan sira no bele hakbi’it ona ekonomia família hodi fó eskola ba nia oan sira.

Entretantu, programa Bolsa da Mãe Jerasaun Foun lansa ona iha loron 17 Juñu fulan kotuk, hahú husi loron lansamentu to’o loron 30 Juñu, programa refere rejista ona inan isin rua, labarik no labarik ho defisiénsia iha Munisípiu Ainaro, Bobonaro inklui RAEOA hamutuk 4, 254. Husi total rejistradu ne’e, iha númeru 3,570 mak hetan ona aprovasaun no sei simu pagamentu.

Ho nune’e, husi programa BdM-JF, inan isin rua sira sei simu dolar amerikanu $15.00 kada fulan, labarik tinan 3 mai kraik sei simu $20,00 kada fulan no suplementu adisionál ba labarik ho defisiénsia ho osan $10,00 kada fulan.

Nune’e, total pagamentu ba fulan Jullu nian ho montante dolar amerikanu $68,105,00 ne’ebé fahe ba benefisiárius hamutuk 3570, kompostu husi benefisiárius inan isin rua hamutuk 647 (Ainaro 154, Bobonaro 203 no RAEOA 290), benefisiárius labarik hamutuk 2917 (Ainaro 526, Bobonaro 657 no RAEOA 1,734), benefisiárius labarik ho defisiénsia hamutuk 6 (Ainaro 2, Bobonaro 1 no RAEOA 3). Benefisiárius hirak ne’e mak, hetan ona aprovasaun ba fulan Juñu nian no hetan pagamentu iha fulan Jullu 2022.

Pagamentu sei hala’o liu husi konta bankária BNCTL ka karteira elektrónika Tpay ne’ebé benefisiáriu sira nomeia ona durante sira rejista.

Ba benefisiáriu hirak ne’ebé mak seidauk iha konta bankária, programa BdM-JF sei kria konta bankária ba sira.

Rate this item
(0 votes)
Saturnina da Costa

Jornalista Jornal Independente

https://independente.tl

Independente Digital TV