Tuir komunikadu ne’ebé Online INDEPENDENTE asesu katak, projetu konstrusaun ne’e nu’udar projetu asistensia subvensaun ba seguransa umana iha baze.
Enkuantu, serimónia ne’e organiza husi Fundasaun Hadi’a Dezenvolvimentu Ekonómiku Rurál (HADER), ONG lokál ne’ebé implementa projetu ne’e, ho partisipasaun husi pesoál no membru komunidade sira.
“Japaun mós rekoñese kleur ona edukasaun nu'udar pilar fundamentál dezenvolvimentu nian. Ami konstrui ona edifísiu eskola liu 40, partikularmente iha área rurál iha nasaun tomak no ami hein katak projetu sira-ne'e sei lori mudansa pozitivu no sustentável signifikativu ba povu no labarik sira nia moris iha Maubara,”dehan Embaixadór Japaun iha TL Tetusya Kimura liu husi komunikadu ne’ebé Online ne’e asesu, tersa ne’e (21/10).
Iha komunikadu ne’e haktuir tan katak, ba projetu ida ne’e, Governu Japaun fornese fundus hamutuk dolar amerikanu $72.992 liu husi nia eskema Subvensaun Asistensia ba Projetu Seguransa Umanu iha Baze (GGP).
“Edifísiu eskola foun iha Maubara, suku Vaviquinia hein katak bele kria ambiente edukasaun ne’ebé seguru no ikus mai hasa’e kualidade edukasaun iha área refere,”tenik komunikadu refere.
Entretantu, dezde lansamentu projetu dahuluk iha tinan 2000, projetu hamutuk 146 maka implementa ona tuir eskema GGP iha munisípiu 12 no mós RAEOA.
Enkuantu, projetu sira-ne'e suporta atu hadi'a liu tan infraestrutura komunidade nian, inklui konstrusaun no reabilitasaun ba instalasaun sira eskola nian, postu saúde sira, no sistema fornesimentu bee nian, hodi hatán ba nesesidade umanu báziku oioin iha baze.
