Tuir komunikadu ne’ebé Online INDEPENDENTE asesu katak, eventu ne’e sei foka liu ba parseria ne’ebé sei kontinua entre CARE Timor-Leste, Governu Nova Zelándia, no mós Ministériu Edukasaun.
Nune’e, CARE Timor-Leste sente orgullu hodi sai uma-na’in ba eventu espesiál ida iha Balibo, Munisípiu Bobonaro, hodi selebra impaktu transformativu husi Projetu Lafaek.
“Governu Nova Zelándia orgullu atu hamriik hamutuk ho Timor-Leste hodi suporta iha área edukasaun. Bainhira ita servisu hamutuk nu’udar ekipa ida, husi manorin na’in no estudante sira to’o ita-nia parseiru lokál sira, ita bele halo diferensa loloos, ajuda labarik sira aprende, mehi, no sai líder Timor-Leste nian iha futuru,” dehan Embaixadora Nova Zelándia iha TL Helen Jane Tunnah, iha komunikadu ne’ebé Online ne’e sita, tersa ne’e (21/10).
Entretantu, Diretór Nasionál CARE iha Timor-Leste, Peter Goodfellow hatete, CARE foka liu ba projetu nia alkansa no kompromisu ba justisa sosiál.
“Lafaek la'ós de'it revista ida, maibé mós instrumentu ida ne'ebé forte ba ekuidade no inkluzaun. Bainhira to’o iha estudante, manorin na’in no uma-kain rihun atus ba atus, liuliu iha munisípiu rurál sira hanesan Bobonaro, ami ajuda ultrapasa bareira ba edukasaun no amplifika lian sira ne’ebé dala barak ignora hela iha kotuk,”dehan nia.
Entretantu, eventu ida ne’e inklui entrega simbóliku Revista Lafaek Edisaun 3/2025, no demonstrasaun kona-ba oinsá revista ne’e uza iha aula laran husi Grupu Impaktu Lafaek. Ida-ne’e reafirma CARE nia kontinuasaun kompromisu atu hadi’a rezultadu edukasaun no asegura katak labarik hotu iha Timor-Leste iha asesu ba matéria aprendizajen ho kualidade, la importa sira hela iha ne’ebé.
Enkuantu, hahú husi tinan 2001, Projetu Lafaek servisu ona atu hadi'a kualidade edukasaun, hametin lideransa, no promove governasaun inkluzivu no moris-di'ak família nian.
Ho apoiu husi Governu Nova Zelándia, projetu ne'e distribui Revista Lafaek ba estudante liu 245,000 iha pre-eskolár no klase 1-6, manorin na'in 10,000 liu, no uma-kain 148,000 iha teritóriu laran tomak.
