Iha dialogo, entre Ministru Komersiu no Industria, Filipus Nino Pereira ho Negosiante ambulante sira, ne’ebé hala’o iha salaun MCI, Bebora, Dili, Sesta ne’e (19/12), mosu preokupasaun barak relasiona ho fatin ne’ebé la sufisiente ba negosiante ambulante sira hodi halo negosiu.

Negosiante ambulante, Cornelio Sarmento hanesan vendedor ne’ebé durante ne’e fa’an nu iha largo, preokupa tanba durante ne’e sira faan iha largo, dala barak ekipa jestaun munisipiu Dili sempre duni sira ba mai no foti sira nia sasan.

“Importante liu mak fatin ne’ebé ami atu fa’an, sé fatin la iha, ami iha dalan de’it, depois jestaun merkadu sira tun duni ami, lori ami ba ne’ebé, ami husu atu kria fatin ne’ebé dignu hodi ami bele halo ami nia servisu. Ami faan nuu ne’e ba iha merkadu ema la sosa, ami tenke faan duni iha Tasi-ibun,”dehan nia iha ambitu dialogo refere.

Iha biban hanesan, negosiante ambulante Frederico Ornai ne’ebé durante ne’e faan sigaru iha dalan ninian áreador Timor-Plaza nian haktuir katak, bainhira nia faan deit sigaru maka ba iha merkadu manleana, ema sei la sosa ninia sasan.

Hatan ba preokupasaun sira ne’e hotu, Ministru Nino Pereira hatete, governu sei tau matan no kria kondisaun ba negosiante hirak, tanba governu rekoñese negosiante sira nia papél maske ho eskala ki’ik maibé hanesan setór informal, ne’ebé kontribui ona ba desenvolvimentu ekonómiku iha  nasaun, tanba sira iha rendimentu mesak, sira mós kria kampo servisu ba sira nia-aan rasik no sira mós servisu ba ema ida rua.

Tanba ne’e, governu sei koordena ho Autoridade Munisipiu Dili no mós SEATOU atu organiza no tau matan ba negosiante ambulante sira.

Hakarak lee notisias kompletu, asesu deit pajina ka link e-paper INDEPENDENTE: https://digital.independente.tl, edisaun Segunda (22/12/25) no pajina Youtube: Independente TV Digital.