Governu Hakarak Apoia Sosial ba  Ema Kbiit La’ek Featured

By Jullu 07, 2023 323
Dashboard Nasional Rekollamentu no Prosesamentu Dadus (Reprodus) ba Ema ho Problema Bem Estar Sosiál. Foto:Media Gabinete MSSI. Dashboard Nasional Rekollamentu no Prosesamentu Dadus (Reprodus) ba Ema ho Problema Bem Estar Sosiál. Foto:Media Gabinete MSSI.

DILI: IX Governu Konstituisional liu husi Ministériu Solidariedade Sosial no Inkluzaun (MSSI), nafatin fó apoiu sosial ba ema kbiit la’ek ne’ebé namkari iha teritoriu nasional no haree mós impaktu pozitivu sira.

Nia dehan, apoiu ministériu nian atu prepara kondisaun ba maluk sira kbiit laek, atu to’o iha tempu ruma sira bele sai husi siklu kbiit laek, hodi moris fila fali iha situasaun normal hanesan maluk sira seluk.

“Apoiu hotu ne’ebé governu fó alende atu responde ba sira-nia kondisaun kbiit laek, atu kria mós kondisaun hodi prepara sira tuir ema ida-idak ninia kapasidade umana. Tanba apoiu Governu nian ba situasaun kbiit laek, iha tempu ruma sei para. Entaun importante tebes atu sira aproveita apoiu sosial husi Governu hodi prepara sira-nia kapasidade umana, ne’ebé sei lori sira sai husi situasaun kbiit laek”, dehan Xefe Gabinete Estudu no Planeamentu Dezenvolvimentu Institusional (GEPDI), Gil da Cruz, iha komunikadu ne’ebé Online INDEPENDENTE sita, kinta (06/06/23).

Tuir dashboard nasional rekolamentu no prosesamentu dadus (reprodus) ba ema ho problema bem-estar sosial husi MSSI, total ema ho problema bem-estar sosial kategoria nasional hamutuk 33.993. Husi total ida ne’e, dadus família kiak hamutuk 6613, tuir kedas ema ho defisiénsia hamutuk 6472, hafoin feto risku sosio ekonómiku hamutuk 5657. (dadus kompletu bele haree iha grafiku dashboard).

Dadus ida ne’e, tuir Xefe Gabinete katak, seidauk tasak, tanba tenke halo verifikasaun hodi identifika kondisaun real, atu nune’e apoiu sira ne’ebé governu fó bele responde ba sira-ninia nesesidade. “labele ema presiza buat ida, ita fó fali buat seluk”, katak Gil.

Maske nune’e nia hatete, “importante ita hahú ona rekolla dadus, entaun ita nafatin atualiza dadus ema ho problema bem-estar sosial, maibé liu-liu ita atu prepara planu hodi responde ba tipus problema ne’ebé ita-nia ema hasoru”, tenik Gil.

Entretantu, planu ne’ebé di’ak mak planu ne’ebé dezeña tuir dadus, labele tuir ema ida-idak ninia hakarak.

“Tanba husi dadus mak ita iha, ita sukat ona kada tinan ita atu atende ema nain hira, para depois ita bele hatene katak to’o iha tempu ruma ita konklui ona atende ema ho problema tipu sosial, no sira sai ona husi situasaun kbiit laek ka lae”, Gil hakotu.

Rate this item
(0 votes)
Last modified on Sexta, 07 Jullu 2023 10:36
Saturnina da Costa

Jornalista Jornal Independente

https://independente.tl

Independente Digital TV