Governadór BNCTL: Governu presiza kontrola folin sasan iha merkadu Featured

By Cristina Ximenes Juñu 19, 2024 785

DILI: Governadór Banku Sentral Timor-Leste, Helder Lopes hatete, Governu presiza halo kontrola di'ak ba folin sasan iha merkadu nune’e labele afeita ba povu nia kapasidade hodi sosa.

Governadór ne’e dehan, bainhira ko'alia kona-ba inflasaun ne'e koalia mós kona-ba kontrolu ba folin.

“Presu ne'e presiza kontrola, tanba presu sa'e bele afeta ba ema-nia kapasidade kompra, hatun ita-nia nivél kompetividade ho nasaun seluk entermus atrai investór sira mai,” dehan Helder hafoin patisipa palestra ho tema ‘Diversifikasaun ekonomia ba Dezenvolvimentu Sustentável’, iha MNEK, Tersa (18/06).

Tanba  ne'e, tuir nia, tenke hatene saida mak kontribui ba inflasaun.

“Ohin bainhira folin foos mak sa'e, ne'e inflasaun sa'e kedas. Se hatama foos husi rai li'ur mak barak, nusa mak la hanoin atu hasa'e ka eleva kapasidade produsaun foos iha rai laran, hodi nune'e bainhira foos folin sa'e iha rai li'ur karik, pelumenus produsaun rai laran mós iha, bele hasa'e produsaun depois bele kontrola inflasaun iha rai laran.”

“Ha'u hanoin esforsu ne'e governu halo daudaun, mais ita hanesan kontinua fó hanoin ka fó informasaun ba malu ho dadus sira ne'ebé iha, atu nune'e ita-nia na’i-ulun sira, liu-liu husi parte governu no parseiru sira no setor privadu sira, bele kontinua servisu hamutuk hodi rezolve,” hatete nia.

Iha fatin hanesan, Prezidente Repúblika, José Ramos Horta hatete, kona-ba folin aihan ne'e fenomena mundiál, la'ós iha Timor-Leste de'it.

Tan ne’e, uniku solusaun mak governu buka aumenta programa ba vulneravel sira. Fó apoiu ba familia ne’ebé ho vensimentu menus husi $115.

“Tenke haree oinsa apoia, liu-liu ho foos, manutolun. Labele foos de'it tanba uma laran ne'e labarik lubuk ida, labarik labele haan de'it foos maibé haan mós manutolun.”

"Governu tenke haree aumenta ida ne'e to'o tempu ne'ebé ekonomia normaliza," dehan PR Horta.

Rate this item
(0 votes)

Independente Digital TV