Prezidente Konfederasaun Sindikatu Timor-Leste (KSTL), Almerio Vila Nova informa, husi keixa 38 ne’ebé KSTL simu, maioria tanba problema hakotu relasaun servisu.

"Keixa sira ne'e maioria problema mak hakotu relasaun servisu, hapara servisu ne'e mak maiória. Restu husi ida ne'e problema kona-ba over time, problema kona-ba kontratu, problema kona-ba cuti, diskriminasaun, mais maiória mak hapara servisu," dehan Almeiro ba jornalista INDEPEDENTE, iha nia kna'ar fatin, Kinta (24/04).

Husi keixa hirak ne’e, nia hatutan, kazu liu 33 mak rezolve ona no kazu lima daudauk ne’e sei iha prosesu nia laran.

“Kazu 38 ne'e 33 mak rezolvidu, ne'ebé hela de'it lima mak iha prosesu nia laran. Tanba kazu lima ne'e kompleksu uitoan, tanba ne'e ligadu ho funsaun públika ninian, entaun prosesu ne'e KSTL kontinua la'o hela ho negosiasaun,” dehan nia.

Ba kazu funsionariu no asesor gabinete Prezidente Autoridade (PA) RAEOA, nia dehan, KSTL simu relasiona ho Gabinete PA RAEOA nian ne'ebé hapara funsionáriu na'in haat. Asesór na'in rua, ho kondutór ida, staff tékniku ida, ne'ebé na'in haat ne'e mak ami prosesu hela," kataak nia.

"Karta ami fó tiha ona ba iha Prezidente Autoridade RAEOA iha fulan Marsu, depois KSTL hasoru mós ninia asesór legál iha semana rua ba kotuk, nia foti tiha ona informasaun husi parte KSTL ninian. KSTL nia ezijensia mós sira hateke hotu.”

Asesor ne’e, nia hatutan, sei fila fali ba RAEOA nune'e nia hato'o ba PA RAEOA atu bele foti desizaun.

“Ne'ebé ami hein semana ida ona, ami espera katak semana ida ne'e ka semana oin ne'e bele rona ona rezultadu husi enkontru iha semana rua liu ba," katak nia.