Prezidente Konsellu Administrasaun INSS no Fundu Rezerva Seguransa Sosiál (FRSS), Zeferino Bobo da Costa, esplika katak iha fulan Janeiru pagamentu halo ba reformadu na’in 565, no iha fulan Fevereiru ba tan na’in 301.

“Iha Janeiru ita prosesa kazu pendente hamutuk 565. Depois identifika no verifika tan, iha Fevereiru ita halo pagamentu ba na’in 301,” dehan Zeferino ba jornalista sira, iha nia knar-fatin, Kaikoli, Kinta (22/01).

Tuir lista husi Komisaun Funsaun Públiku (KFP), funsionáriu públiku ne’ebé tama reforma obrigatóriu hamutuk 1.985.Husi númeru ne’e, na’in 1.420 mak verifika hotu ona no hein de’it pagamentu, enkuantu na’in 565 sei pendente tanba dokumentu balun seidauk kompletu.

Iha Janeiru to’o Fevereiru, reformadu sira hamutuk na’in 866 mak mai kompleta sira-nia dokumentu no simu ona pensaun.Maibé, sei falta reformadu na’in 264 mak seidauk kompleta dokumentus.INSS husu ba sira atu mai kompleta dokumentu nune’e bele prosesa no simu direitu.

Obstákulu prinsipal ba kazu pendente sira mak problema dokumentu bankária, inklui kopia konta banku ne’ebé la moos, ne’ebé bele lori risku transfere osan ba konta seluk.

Ho nune’e, INSS haruka ona notifikasaun liu husi KFP atu aviza benefisiáriu sira hodi kompleta dokumentus.

Kona-ba eskema pagamentu, Zeferino esplika katak pensaun ba reformadu sira halo liu husi rejime rua: rejime tranzitóriu no rejime jerál.

Rejime tranzitóriu aplika ba tempu servisu molok sistema seguransa sosiál estabelese, husi 20 Maiu 2002 to’o 2017, ne’ebé sai responsabilidade Estadu nian. Husi 2017 ba oin, tama iha rejime jerál, ne’ebé kalkula direitu pensaun la tuun liu husi 50 porsentu.

Montante pensaun depende ba durasaun servisu no salariu ne’ebé funsionáriu simu bainhira sei ativu.INSS garante katak pagamentu pensaun sei halo kada fulan to’o benefisiáriu lakon vida, liu husi mekanizmu transferénsia bankária.

Ba pagamentu pensaun iha periodu ne’e, INSS aloka orsamentu hamutuk $3.451.976,53 atu asegura direitu reformadu sira kontinua hetan ho regularidade.