"Ita konklui ona iha fulan Janeiru no Fevereirun, nune'e relatóriu finál ba ona Ministériu Públiku,” dehan nia bainhira sai bainaka iha lansamentu programa foun Ajensia TATOLI, ‘Bainaka Kredivél’ iha salaun enkontru Borderless, Praia dos Coqueiros , Tersa (05/05).

Maski nune’e, situasaun komplikadu mosu bainhira Prokuradór Jeral Repúblika (PJR) foti hikas kazu 23 ne’ebé KAK rejista.

“Kazu balun ne'ebé PJR hatun despaixu katak kazu hirak ne'e dada hotu. Ami haruka karta rua ba PJR maibé laiha resposta. Maibé KAK kumpre hela prazu no orientasaun ne'ebé mai husi Ministériu Públiku, Prokuradór titulár sira," nia dehan.

Komisáriu ne’e alerta katak asaun PJR bele lori implikasaun legal iha futuru, liu-liu bainhira kazu sira delega fali ba unidade seluk hanesan PSIK.

"Advogadu neʼebé matenek husu atu anula prosesu tanba instituisaun ne'ebé iha kompeténsia atu halo investigasaun kriminál ba kazu korrupsaun mak KAK la'ós PSIK, la'ós PNTL, entaun ha'u esklarese atu nune'e públiku bele hatete," dehan Komisáriu ne'e.

Atu responde ba situasaun ne’e, KAK planeia atu lori asuntu ne’e ba Provedoria dos Direitos Humanos e Justiça (PDHJ) atu halo fiskalizasaun kona-ba posível abuzu podér husi PJR.

"Ami konsidera PJR halo abuzu de poder. Ami bele prosesu liu husi mekanizmu ne'ebé mak iha, tanba ne’e ha'u husu ba PJR atu redelega kazu hirak ne'e mai KAK, tanba KAK mak iha podér atu halo investigasaun ba kazu korupsaun nian," katak nia.

Komisáriu KAK ne’e bolu instituisaun sira atu tau diferensa ba kotuk no servisu hamutuk hodi kombate korupsaun.

"Hanesan ema profisionál ita-nia ego ne'e tau tiha ba kotuk hodi servisu hamutuk atu kombate korrupsaun, ida ne'e mak ita-nia objetivu loloos," katak nia.

Entretantu, to’o notisia ne’e hatun, Jornalista Jornal INDEPENDENTE seidauk halo konfirmasaun ho parte PJR.