“Iha SSM Dili hahú husi fulan-Janeiru kazu dengue hamutuk 32, Fevereiru kazu hamutuk 121, Marsu kazu hamutuk 239 no Abril kazu hamutuk 107 tanba ne’e total hamutuk 499,”dehan nia iha nia knaar fatin, segunda-horisehik.

Nia esplika, postu administrativu 4 iha munisipiu Dili afeita hotu ba moras dengue husi Postu Administrative Dom Aleixo  kazu aas liu hamutuk 291, Postu Administrativu Kristu Rei kazu hamutuk 82, Postu Administrative Vera Cruz kazu hamutuk 81 no Postu Administrative Na’in Feto kazu hamutuk 44 no Postu Aadministrativu Atauro kazu 1.

Haree husi dadus ne’e maioria iha Postu Administrativu Dom Aleixo, iha suku 7 afetadu hotu. Tanba ne’e SSM halo intervensaun hodi rega nafatin fomegasaun ba kazu sira ne’ebé rejista no halo fulberizasaun ba area afetadu sira ne’e nomós rega fogging ba kazu afetadu nia uma nomós iha Postu Administrativu hotu-hotu iha Dili laran.

Nia esplika, halo komparasaun ho dadus iha tinan kotuk, Janeiru kazu hamutuk 14, Fevereiru kazu hamutuk 80 no iha Marsu kazu 104.

Tanba ne’e nia konfesa katak, tinan ida ne’e kazu aas tanba impaktu husi inundasaun sira halo jestaun ba lixu la diak no lixu namkari arbiru.

Aliende ne’e, preokupa mós ba moras Covid-19, tanba ne’e komunidade sira ladun tau atensaun maximu ba ambiente sira.

Maski nunee ekipa promosaun Edukasaun Saúde tama sai nafatin suku no aldeia bairu hodi fó hanoin nafatin ba komunidade sira atu tau atensaun ba ijiene pessoal moris iha ambiente saudavel.