Tuir Portavoz, Jorge Madeira, hateten, hafoin akontese asaun problemátiku lubuk ida hanesan, joven ida mate iha sela Komando PNTL Kaikoli, Dili, no konfrontu entre joven sira iha area Bidau, Audian no Vila Verde.

Nune’e, problema hirak ne'e sai preokupasaun husi publiku, no hamosu ona perturbasaun ba Ordem Publiku no la obdese ba Konstituisaun RDTL Artigu 146 no 147, ho asaun hirak ne'e halo komunidade sira iha Kapital Dili paniku no sente la seguru.

Ho nune’e, sosiedade sivil, husu ba Sekretáriu Estadu Juventude no Desportu (SEJD) ho KRAM atu halo revisaun fali ba Lei nu. 5/2017 ba “Regime Jurídico Relativo Á Prática de Artes Marciais, e Rituais.

"Ami husu ba SEJD no KRAM atu, hare'e didi'ak estatutu arte marsiais no arte rituais sira nia objetivu, iha sira nia estatutu, para bele regula sira nia atividade diaria ho klaru,"dehan nia liu husi konferensia imprensa iha salaun FONGTIL, Kaikoli, Dili, segunda ne’e (12/09).

Tanba ne’e, sosiedade sivil husu ba lider organizasaun arte marsiais no arte rituais atu tau matan no kontrola makas ba nia membru sira.

Entretantu, Portavoz ne’e dehan, sosiedade sivil hakarak apela mós lideransa politika sira, atu labele uza bebeik organizasaun arte marsiais no arte rituais, atu garante ba iha kampaña Polítika sira.

Enkuantu, apela mós ba Tribunál Rekursus no Komisaun Nasional ba Elisaun (CNE), atu labele rejistu partidu polítiku ne'ebé halo politika subar-an iha organizasaun arte marsiais no arte rituais, atu nune’e labele halo povu mak vitima nafatin.

Nune’e sira mós husu ba Primeiru Ministru no Ministru Interior atu halo revogasaun ba dekretu lei ne'ebé reativa fali, organizasaun arte marsiais no arte rituais.

"Ami nia lametasaun sira hato'o, tuir dadus ne'ebé FONGTIL  ho rede setoral sira hetan liu husi monitorizasaun iha terenu, hahú husi dia 31 fulan-Agusto mai to'o ohin loron”.