Aleinde, iha sorumutu ne’e, koalia mós ba komemorasaun loron falesimentu Saudozu Sebastião Gomes ba dala-31.
Prezidente Konsellu Impresa (KI), Virgílio Guterres, hatete, iha sorumutu ne’e, parte Komisaun Organizadora Max Stahl nian, informa ba Konsellu Imprensa kona ba serimonia deslutu Max Stahl nian.
Nune’e mós iha asuntu importante rua ne’ebé sira hato’o ba Konsellu Imprensa, ida, kona-ba prosesu rekoñesimentu ba jornalista sira, no pontus daruak kona-ba oinsa planu involvimentu Konsellu Imprensa nian iha serimonia ne’e, hodi garante kobertura ne'ebé maximu ba komemorasaun tomak.
"Ohin maluk sira husi Sentru Audivizual Max Stahl nian no mós Komisaun Organizadora ba serimonia deslutu Saudozu Max Stahl nian, mai aprezenta ba Konsellu Imprensa kona-ba planu ne'ebé sira iha, oinsa hamutuk ho ita komemora tinan ida ba Saudozu Max Stahl ninia mate,”dehan nia iha Edifisiu KI, Kintal Boot, segunda ne’e (12/09).
Nia hatutan, iha serimonia komemorasaun loron deslutu ne’e, sei atribui mós premiu jornalizmu ba naran jornalista sira liu-liu premiu ba dokumentariu audivizual ba Saudozu Max Stahl nian.
Iha fatin hanesan, Prezidente Komisaun Organizadora Rogerio Castro da Cruz, hateten, sira mai informa ba KI kona ba loron komemorasaun ba deslutu Saudozu Max Stahl nian, iha 28 Outubru 2022.
Nia dehan, iha loron 28 Outubru ne’e, aliende, Max Stahl nia mate, sei selebra mós loron falesimentu Saudozu Sebastião Gomez nian, tanba sira na'in rua mate loron ida deit.
“Entaun Komisaun Organizadora tenki kria ekipa boot ida, hodi servisu hamutuk ho ministeriu sira hotu, atu haree asuntu sira ne’e,”nia dehan.
Entretantu, tuir planu, iha loron 27 fulan-Outobru, sei halo seminariu nasional ida, hodi konvida orador na'in tolu, atu fahe hanoin ruma kona ba Saudozu Max Stahl no Sebastião Gomez luta iha to’o nia mate.
Nune’e, iha loron 28 Outubru, sei selebra misa agradesementu, hafoin sai husi misa, sei lori aifunan ba tau iha Saudozu Max Stahl no Sebastião Gomez nia rate.
Enkuantu, orsamentu provizoriu ba preparasaun serimonia ne’e, Komisaun Organizadora tau ona montante dolar amerikanu rihun $30, maibé sei iha mudansa, tanba sei haree mós ba Saudozu Max Stahl nia kaben no oan ne’ebé mai partisipa iha serimonia ne’e.
