Diretór Ezekutivu SAMES, Santana Martins hateten, daudaun ne’e SAMES enfrenta hela problema ho ai-moruk Via Jepang no item radiolojia nian ne’ebé estoke laiha iha armazén tanba kestaun transportasaun tarde.

“Ai-moruk rua ne’e sai hanesan preokupasaun boot ba SAMES, oinsá halo esforsu atu hatama lalais ai-moruk ne’e hodi distribui ba ospitál. Entaun, labele konsege responde hotu pedidu sira mai ne’e, tanba ita nia ai-moruk mak laiha,” nia hateten hafoin partisipa diskuasaun Jornada Orsamentál 2023, iha Ministériu Finansas, Kinta (30/06).

Ai-moruk sira ne’e tama tarde tanba kestaun husi transportasaun ne’ebé  husi Singapura tenke fila fali ba India, ida-ne’e mak dezafius boot SAMES hasoru.

“Ne’e duni, Governu iha osan bele sosa ai-moruk maibé seidauk fó apoiu másimu mós difikuldade ba ita,” nia hateten.

Tuir tarjetu, hakarak ai-moruk rua ne’e loron 1 fulan Jullu ne’e tenke to’o ona rai laran, tanba SAMES esforsu durante fulan tolu nia laran ona.

Bainhira ai-moruk ne’e iha Singapura tenke lori lai ba India, maibé difisil tebes atu hetan nakotika ne’e iha tempu badak.