Aleinde, apoiu úmanitaria ba familia kbiit laek, apoia mós Asosisasaun Defisiensia Matan Timor-Leste (AHMDTL) no Madre CMM sira iha Manleuana.
Tuir Espoza Prezidente Repúblika Timor-leste, Cidalia Nobre hatete, apoiu sira ne’e mai husi komunidade Xineza sira iha Timor-Leste no Australia.
“Antes ami fó apoiu ida ne’e, ami simu uluk apoia husi maluk Xineza sira iha Timor-Leste no Australia, hanesan fós, mina, rinso no supermie,”dehan nia ba jornalista sira iha edifisiu madre CMM Manleuana, kuarta ohin (23/06).
Nia hatutan, fós ne’ebé komunidade Xineza apoia ba Gabinete Espoza PR, sira distribui ona hamutuk saka 150 ba komunidade kbiit laek sira.
“Nune’e, ohin sira intrega tan sasan balun atu distribui ba maluk kbiit laek no familia vulneravel iha Suku Kuluhun no mós lori hela uituan mai ita maluk defisiensia matan sira no ami kontinua mai iha fatin ne’e hodi fó ba madre sira,”tenik nia.
Iha sorin seluk, Xefe Suku Kuluhun, Deus Dado Martins espresa nia sentimentu, tanba Governu liu husi Espoza Prezidente bele konsidera sira nia pedidu atu apoiu familia kbiit laek sira iha suku refere.
Enkuantu, familia kbiit laek iha suku Kuluhun ne’ebé hetan apoia husi Espoza PR hamutuk na’in 10. Nune’e, kada ema ida sei hetan fós saka 1, mina 2, rinso kaixa 1 no supermie kaixa 1.
Entretantu, Prezidente Konsellu Fiskal iha AHMDTL, Zilberta dos Santos Pereira hatete, defisiesia matan eziste ona besik tinan 10, ba dahuluk Espoza Prezidente Repúblika vizita sira nia fatin, nune’e halo sira kontente tebes.
“Senti kontente tanba durante ami nia ezistensia, foin primeira vez ita nia inan-nasaun mai vizita fatin ida ne’e, hodi hatene saida mak Ema ho Defisiensia matan hasoru,”dehan nia.
Ho nune’e, ema ho defisiensia ne’ebé akumula iha fatin refere hamutuk na’in 60, kompostu husi mane na’in 33 no mane 27, inklui labarik sira hamutuk 20.
Enkuantu, apoia ne’ebé Espoza PR oferese ba sira mak hanesan fós saka 10, mina, rinso no supermie.
Irmãn Ismenia Sances dos Santos hatete, apoiu ne’ebé Espoza PR oferese, sei ajuda fali ba vitima inunadasaun ne’ebé oras ne’e dadauk sei iha fatin evakuasaun.
Asistente Editor: Saturnina da Costa
