Espoza PR Agradese Ba Apoiu Umanitaria Asosiasaun Xineza Timoroan Iha Australia Featured

By Saturnina da Costa Abril 20, 2021 472
Espoza PR hamutuk ho Asosiasaun Xineza Timoroan. Foto:Gab PR. Espoza PR hamutuk ho Asosiasaun Xineza Timoroan. Foto:Gab PR.

DILI:Espoza Prezidente Repúblika Cidália Nobre Lopes Mouzinho Guterres agradese apoiu umanitáriu husi Asosiasaun Xineza-Timoroan iha Australia ba vítima dezastre naturál ne’ebé akontese iha 4 fulan-Abril 2021.

komunikadu ne'e husi gabineti Presidente ne'ebe Online Independente asesu ohin (20/04).
Gabinete de Apoio à Actividade do Cônjuge do Presidente da República simu apoiu umanitária fós saku 125 no supermi kaixa 125 husi Asosiasaun Xineza Timoroan husi Australia. Membru sira iha asosiasaun moris iha Timor-Leste no hela iha Sydney.
“Ha’u hato’o ha’u-nia agradesimentu ba Asosiasaun Xineza Timoroan husi Australia ne’ebé fó ona apoiu mai Gabinete,” Espoza Prezidente Repúblika hateten.
Espoza Prezidente Repúblika hateten katak sei temi Asosiasaun Xineza Timoroan iha Australia nia naran bainhira distribui apoiu umanitária ba vítima dezastre naturais.
“Apoiu la’ós de’it husi Prezidénsia Repúblika no Gabinete maibé sei temi husi Asosiasaun la’ós de’it iha Timor maibé mós iha Australia atu fó apoiu no solidaridade iha situasaun tempu difísil ida ne’e.
Hafoin dezastre naturais ne’ebé akontese iha 4 abril, Espoza Prezidente Repúblika vizita komunidade sira ne’ebé sai vítima husi dezastre naturais fatin barak iha Díli laran, Hera no Metinaro.
Espoza Prezidente Repúblika mós vizita no distribui apoiu umanitáriu ba komunidade afetadu iha Hera, Manleuana no Becora.
Prezidente Associação Comercial da Comunidade Chinesa Timorense (ACCCTO) Kathleen Gonçalves informa katak Asosiasaun Xineza Timoroan iha Australia husu atu ninia organizasaun entrega apoiu umanitáriu ne’e ba Espoza Prezidente Repúblika.
“Ho laran haksolok tebes asosiasaun hakarak apoiu ba komunidade ne’ebé afetadu,” Kathleen Gonçalves hateten.
Asosiasaun Xineza Timoroan haruka apoiu umanitáriu husi Australia hamutuk fós saku 1250, supermi kaixa 600, be 300, mina 50 hodi fahe ba instituisaun oioin iha Timor-Leste. Apoiu sira ne’e entrega Governu liuhusi Sekretáriu Estadu Protesaun Sivíl, Gabinete de Apoio à Actividade do Cônjuge do Presidente da República, organizasaun sosiedade sívil no individu sira.
Associação Comercial da Comunidade Chinesa Timorense hahú fó apoiu umanitáriu desde 4 abril ba vítima dezastre naturais liuhusi Sekretáriu Estadu Protesaun Sivíl, Igreja, Hera Tasitolu, Aitarak Laran no Manleuana.

 

Jornalista:Saturnina da Costa

Editor:Jose Sarito Amaral

Rate this item
(0 votes)

Independente Digital TV