Kuarta, 20 Outubru 2021 | Login
Diretora Assosiasaun Chega ba Ita (Acbit) Manuela Leong. Foto: Independente Diretora Assosiasaun Chega ba Ita (Acbit) Manuela Leong. Foto: Independente

Esforsu Acbit, Oan Husi Vitima Violasaun Sexual Na’in 5 Hetan Ona Sertidaun Batizmu Featured

DILI:Molok ne’e oan husi vitima violasaun sexual iha tempu pasadu, susar atu hetan sertidaun batizmu iha Igreja Munisipiu Vikeke, maibé hafoin esforsu husi Assosiasaun Chega ba Ita (ACbit), oan na’in lima konsege hetan tratamentu di’ak hanesan ema sira seluk.


Assosiasaun Chega ba Ita (Acbit) Manuela Leong Pereira hatete, aliende na’in 5 mak hetan ona sertidaun batizmu, sei halo kooperasaun di’ak ho Dioseze Dili hodi buka tuir oan sira seluk husi vitima violasaun sexual bele hetan sertidaun batizmu.
"Agradese ba Igreja Katolika tanba bele rekoñese esforsu ne’ebé durante ne’e ACbit halo hodi fasilita feto vitima violasaun sexual pasadu sira nia oan bele hetan sertidaun batizmu,"dehan Manuela ba Jornalista Independente online, iha Palapaso, Dili ohin.
ACbit identifika husi oan na’in 7 ne’ebé vitima husi violasaun sexual iha trajedia Kraras Vikeke, na’in lima hetan ona sertidaun batizmu no hela na’in rua mak sei iha prosesu laran.
“Prosesu hodi trata sertidaun batizmu ba oan husi vitima violasaun sexual ida ne’e maski susar maibé ho aproximasaun ne’ebé ACbit halo ba parte Igreja Katolika iha Vikeke bele fasilita sira hodi hetan sertidaun batizmu ba sira na’in 5 ho identidade igocnito, entertantu na’in 2 seluk sei iha hela prosesu tanba sei ajusta kriteria ba dokumentu sira,”dehan Manuela.
Alende ne’e, ACbit identifika vitima violasaun sexual sira nia oan na’in rua iha Baucau Vila seidauk hetan sertidaun batizmu.
Relasionadu parte Igreja klarifika ona katak la taka dalan ba oan sira husi vitima violasaun sexual iha tempu pasadu, ho positivamente Diretora ACbit responde katak tempu badak sira sei hakat ba Dioseze Dili hodi rona informasaun lolos no sei halo kooperasaun entre ACbit ho Dioseze Dili atu fasilita di’ak liutan vitima violasaun sexual sira.
"Klaru katak vitima husi violasaun sexual akontese dala barak iha tempu kolonialismu Indonesia no Japaun, no sira barak mak até agora laiha sertidaun batizmu maibé sira tenke hakbesik ba Igreja Katolika hodi tuir prosesu ne’ebé implementa ba sarani katoliku hot-hotu iha Timor-Leste,"Responsavel Dioseze Dili, Padre Paulus Maia klarifika antes ona liu husi Independente Online.
Husi klarifikasaun Igreja Katolika ne’e, parte ACbit agradese ba klarifikasaun ne’e no espera katak iha tempu oin mai oan sira husi vitima violasaun sexual sira bele hetan ona sertidaun batizmu tuir kriteriu sira ne’ebé define husi Igreja.
"Agradese ba Diosese Dili ne’ebé hakarak fasilita vitima violasaun sexual pasadu nia oan sira hodi bele hetan tan sertidaun RDTL, tanba ne’e ACbit sei ba halo marka enkontru ho Responsavel Jeral Dioseze Dili nian hodi rona direitamenta kriteria sira ne’ebé Igreja Katolika aplika ba sarani katoliku sira hotu iha Timor-Leste,"dehan nia.
Nia akresenta liu tan, vitima violasaun sexual pasadu sira nia oan tenke iha sertidaun batizmu tanba bainhira urus Bilhete de Indentidade no dokumentu importante seluk nasaun nian presija.

Read 783 times
Rate this item
(0 votes)