Iha 18 Outubru, horseik, Komisaun B Parlamentu Nasional realiza duni promesa hodi hala’o enkontru ho entidade defeza no seguransa.
Iha enkontru ne’ebé realiza hahú husi tuku 14.30 Oras Timor-Leste to’o tuku 21.10 OTL ne’e hetan partisipasaun husi Xefe Estadu Maior Jeneral F-FDTL, Tanente Jeneral Falur Rate Laek, Komandante Jeral PNTL ne’ebé reprezenta husi Komandante PNSIK, Superintendente Xefe Jorge Monteiro, SNI, SM, KAK, Alfandega, Migrasaun no PSIK.
Hafoin enkontru Prezidente Komisaun B, José Agustinho Siqueira ‘Somotxo’ informa, nia parte konvoka reuniaun ne’e hodi ezije ba entidade defeza no seguransa hotu-hotu atu tenke asegura segredu estadu.
“Iha rai hotu-hotu dehan segredu estadu ne’e segredu estadu. Laiha kobertura husi komunikasaun sosial no see mak hetan konvokatoriu mak partisipa,” dehan Somotxo via telefone, Tersa (18/10).
Entretantu, tuir fonte importante ida, iha enkontru ne’e entidade defeza no seguransa ne’ebé hola parte apresia asaun husi Gastão hasoru Naimori ho Vise Ministru na’in rua.
“Hotu-hotu louva no apresia asaun husi maun Gastão,” dehan fonte ne’e.
Nia hatutan, entidade hirak ne’e mós enkoraza nafatin Gastão atu mantein asegura supremasia lei.
“Laiha presaun ba maun Gastão. Sira hotu-hotu enkoraza tan atu mantein hodi asegura supremasia lei,” fonte ne’e informa.
Vise MI La Partisipa
Maske Vise Ministru Interior, Antonio Armindo, hetan mós ‘konvite’ atu partisipa iha enkontru refere, maibé Vise MI ne’e la marka prezensa.
“Vise MI la partisipa ida ne’e ohin hetan ona konfirmasaun husi Primeiru Ministru (katak) iha asuntu servisu, viajen ba estrajeiru,” informa Prezidente Komisaun B, Somotxo.
Entretantu, fonte importante ida afirma informasaun husi Somotxo katak, Vise MI akompaña Prezidente Repúblika José Ramos Horta ninia viajen ba estranjeiru tan ne’e nia la marka prezensa iha enkontru refere.
Molok ne’e, Prezidente Komisaun B Parlamentu Nasionál (PN) ne’ebé trata asuntu Defeza no Seguransa, José Agostinho Sequeira ‘Somotxo’ informa, iha 18 Outubru, Komisaun B sei realiza enkontru ho aparelu estadu husi Ministériu Interior no Ministériu Defeza.
"Ha'u konvoka tiha ona dia 18 (Outubru) aparelelu estadu hanesan Servisu Investigasaun Kriminál, Servisu Informasaun, Servisu Intelijénsia ne'ebé ligadu ba Ministériu Interiór no Defeza sei diskuti problema hotu ne'ebé mak akontese iha rai laran," informa Somotxo iha Parlamentu Nasionál, Sesta (14/10).
