Diretór Nasionál Empregu no Estranjeiru, Sekretariu Estadu Formasaun Profesional no Empregu (SEFOPE), João Correia Pereira informa, iha tinan ne’e empregador Autralia 235 no ajente 135 hetan ona aprovasaun atu halo rekrutamentu ba Timor-oan.
"Ita iha empregador hamutuk 235 aprova husi Australia atu halo rekrutamentu ba Timor-oan sira ba servisu iha Australia, no ajensia kuaze 135," dehan João ba jornalista sira, iha nia knar-fatin, Bekora (26/05).
Ho nune’e, nia dehan, iha semana kotuk, halo ona teste ba Timor-oan na’in 556, no iha semana oin sei rona ninia rezultadu.
Aleinde ne’e, tuir planu, iha fulan Jullu sei halo tan teste ba Timor-oan na’in 300 atu bele ba servisu iha Australia.
Tan ne’e, nia husu joven sira atu tenke preparadu tanba empregador sira husu ema ne'ebé ho kualifikasaun di’ak.
Aleinde ne’e, Diretór ne’e informa mós katak, kada tinan traballador Timor-oan hetan kontratu foun atu ba servisu iha Australia hamutuk na’in 1.200.
"Kada tinan traballador Timor-oan kuaze rihun lima hetan oportunidade ba servisu iha Australia, ita iha dadus foun kandidatu Timor-oan rihun 14 mak seidauk hetan oportunidade atu ba servisu iha Australia," dehan nia.
