Diplomata ne’e hala’o despedida ho xefe governu tanba missaun nu’udár Embaixadór Suiça bá Indonézia, Association of Southeast Asian Nations (ASEAN) no la’ós rezidénte iha Timor-Leste dezde Setembru 2023 remata ona.

“Ha’u mai iha-ne’e atu despede Primeiru-Ministru tanba ha’u sei sai hosi rejiaun ne’e iha loron sira tuir mai,” dehan Oliver Zehnder, iha palásiu Governu, horisehik.

Iha enkontru despedida ne’e, Embaixadór ho Primeiru-Ministru hala’o mós diskusaun ligadu ho dezenvolvimentu ne’ebé la’o iha Timor-Leste no aproveita hodi kongratula adezaun bá ASEAN.

“Ha’u mós hakarak rona kona-bá dezafiu sira ne’ebé TL hasoru hanesan empregu no diversifikasaun ekonomia,” nia hatutan.

Tanba ne’e, nia konsidera importante tebes atu hametin kooperasaun ne’e hodi bele envolve setór privadu sira sai kompetitivu liután.

Durante ne’e Suiça ho Timor-Leste estabelese ona kooperasaun iha área importante sira atu ajuda dezenvolvimentu no estabilidade iha rai laran.

Área prinsipál sira ne’ebé estabelesidu mak hanesan, governasaun no demokrasia iha ne’ebé Suiça apoia Timor-Leste iha fortalesimentu Instituisaun Públiku, promove transparénsia no boa governasaun, suporta prosesu eleisaun no partisipasaun sidadaun.

Alende ne’e, kooperasaun iha área dezenvolvimentu rurál no agrikultura iha ne’ebé ajuda komunidade rurál sira atu hasa’e produsaun ai-han, promove seguranza alimentár liu-hosi apoia agrikultura sustentável.

Iha mós kooperasaun bá asuntu mudansa klimátika no ambiente, liuliu projétu sira ne’ebe proteje floresta no bee, ajuda komunidade adapta bá mudansa klimátika, promove uza rekursu naturál ho forma sustentável.

Koperasaun seluk maka, empregu no dezenvolvimentu ekonómiku bá kriasaun oportunidade servisu bá juventude, promove treinamentu profisionál (skills) inklui ajuda negósiu ki’ik no médiu (SME).

Iha mós kooperasaun kona-bá promove Páz no estabilidade liu-liu suporta diálogu sosiál no rezolusaun konflitu, promove páz duradoura iha komunidade, liu-hosi kooperasaun ho Swiss Agency for Development and Cooperation.