Embaixadór Carlito Nunes hatete, Primeiru-Ministru fó orientasaun atu foku ba setór sira ne'ebé durante ne’e iha ona akordu liu husi nota entendimentu ho Governu Índia ne’ebé la konsele implementa.
“Primeiru Ministru fó orientasaun atu foku bá setór balun ne’ebé durante ne’e iha ona akordu liu-husi asinatura nota entendimentu ho Governu Índia, balun konsege implementa maibé balun seida’uk konsege, tanba TL seida’uk iha ninia embaixada iha India, nune’e mós India seida’uk iha embaixada iha Dili,” dehan Carlito Nunes liu husi komunikadu ne'ebé Online INDEPENDENTE asesu iha Pájina ofisiál Primeiru-Ministru Kay Rala Xanana, Kuarta ne’e (21/05).
Ho estabelesimentu embaixada TL iha Nova Delhi India no mós Embaixada India nian iha Dili sei haforte liu tan relasaun entre país rua nian, atu bele implementa akordu ho nota entendimentu sira ne’ebé iha ona ho prinsípiu mútua entre interese nasaun rua nian.
Rekorda katak, iha agostu 2024, primeira vizita Estadu Prezidente India, Petahana Droupadi Murmu iha Timor-Leste, asina nota entendimentu tolu mak hanesan, primeiru livre ba pasaporte diplomátiku ho pasaporte servisu ne’ebé agora implementa ona, segundu maka akordu kona ba programa interkámbiu kulturál ne’ebé agora daudaun sei iha koordenasaun ho Sekretáriu Arte no Kultura, atu bele implementa no terseiru maka akordu kona ba broadcasting husi Televizaun Índia nian ho média Estatál RTTL,EP ne’ebé sei iha koordenasaun atu bele haree hamutuk.
Iha mós akordu lubuk ida desde 2015 to’o 2024, estabelese akordu ho Ministériu Saúde kona ba kuidadu saúde públiku no akordu ne’e inválidu ona presiza atu halo renovasaun iha tempu badak.
Ida seluk mak kona ba akordu iha área edukasaun nian ne’ebé kada tinan India oferese bolsu estudu 25 mai Timor-Leste no ida ne’e mós hanesan akordu ida ne’ebé sei foka durante mandatu Embaixadór Carlito Nunes.
Akordu ida tan entre India ho Timor-Leste mak sei loke Sentru Informasaun Teknolojia (IT), maibé Timor-Leste mak seida’uk fó espasu, tanba ne’e akordu ne’e seida’uk bele implementa, India rasik sei mai ho péritu sira, ekipamentu atu fó formasaun ba foinsa’e sira.
Iha mós akordu ida kona ba estudante medisina husi India ne’ebé agora daudaun iha na’in 300 mak hala’o hela estudu iha Timor-Leste, balun iha Universidade Catolica Timoresne (UCT) no balun iha Universidade da Paz (UNPAZ).
“Ida ne’e sira mai ho sira nia professór no sira nia fasilidade rasik, hanorin mak iha ne’e uza de’it ita nia espasu. Depois sira sei akredita tuir padraun internasaionál, tanba uza hela sistema rua Timor-Leste ho India, nune’e tenke hetan akreditasaun atu sira bele asesu ba servisu iha nasaun ne’ebé de’it,” nia hateten.
Enkuantu, Primeiru-Ministru fó orientasaun ida espesífiku ba Embaixadór ne’e atu esplora liu tan oportunidade hodi halo akordu iha área eko-turizmu.
Entretantu, Prezidente Repúblika (PR), José Ramos Horta fó pose bá Carlito Nunes nu’udár Embaixadór Extraordináriu no Plenipotensiáriu dahuluk Timor-Leste nian ba India iha kuarta 14 maiu 2025, iha Palásiu Prezidente Nicolau Lobato, Bairru-Pité.
Tuir planu, Carlito Nunes sei arranka iha semana ne’e nia laran atu bele hahú misaun hanesan reprezentante Estadu Timor-Leste iha India.
