Eis-PM Taur Matan Ruak Solidariza Populasaun Afetadu Husi Dezastre Naturais Featured

By Jullu 06, 2023 377
Udan boot ne’ebé provoka inundasaun no rai halai afeita ba area balun iha munisipiu sia. Iha imajen ne’e rai nakfera besik ona komunidade balun nia uma iha Bairo Maligirik, Aldeia Orun, Suku Ogues, Postu Administrativu Maukatar, Munisipiu Kovalima, Tersa (04/07). FOTO: espesial. Udan boot ne’ebé provoka inundasaun no rai halai afeita ba area balun iha munisipiu sia. Iha imajen ne’e rai nakfera besik ona komunidade balun nia uma iha Bairo Maligirik, Aldeia Orun, Suku Ogues, Postu Administrativu Maukatar, Munisipiu Kovalima, Tersa (04/07). FOTO: espesial.

DILI: Eis-Primeiru-Ministru husi VIII Governu Konstitusionál, Jenerál Taur Matan Ruak husi períodu 2018-2023, sente triste hare'e notísias iha semana ne’e kona-ba akontesimentu dezastre naturais iha Kosta Sul País nian kauza husi udan boot loron hirak ne’e nia laran, hodi estraga infraestruturas públiku no privadu lubuk ida inklui hamate sidadaun balun.

Nia dehan, akontesimentu ne’e fó hanoin fali ba iha kalamidade ne’ebé akontese ona iha 04 Abril 2021 ne'ebé kuaze destrói infraestruturas lubuk ida no hamate ona sidadaun balun.

“Ha'u fiar katak IX Governu Konstitusionál liu husi Primeiru-Ministru Xanana Gusmão orienta ona liñas ministeriais sira atu halo asaun emerjénsia emidiata ruma hodi  salva ita-nia populasaun no sira nia bens sira nomos buka minimiza risku boot liutan”, Online INDEPENDENTE sita iha komunikadu, kinta ne’e (06/07).

Entretantu, Eis-Primeiru Ministru ne’e mós hato’o nia sentidu sentidas kondolénsias ba família sira ne’ebé lakon sira nia ema iha dezastre ida ne'e, no hato’o solidariedade boot ba família vítima sira ne'ebé afetadu iha dizestare ida ne'e.

“Ha'u mós solidariza IX Governu no realsa iha situasaun sira hanesan ne’e ita tenke hamutuk luta hodi rekupera, rehabilita no rekonstroi fali distruisaun hirak ne'ebé provoka hosi dezastre naturais. Hakuak boot ba imi hotu”.

Rate this item
(0 votes)
Last modified on Kinta, 06 Jullu 2023 12:49
Saturnina da Costa

Jornalista Jornal Independente

https://independente.tl

Independente Digital TV