Diretór EBC Balibo Gregório Skono hatete, ho prekupasaun ne’e, sira kordena ona ho inan-aman sira atu buka solusaun ba situasaun refere.
Atu nune’e, buka professor voluntariu sira hodi kompleta disiplina ne’ebé durante ne’e sei mamuk.
“Preokupasaun ne’ebé durante ne’e ami infrenta mak hanesan professor menus, tanba iha eskola EBC balibo númeru estudante barak ho ida ne’e mak ami buka dalan oinsa atu taka ami nia disiplina ka kada orariu ne’ebé sei falta professor,” dehan nia iha igreja Balibo, sabadu (16/10).
Nia hatutan, sira hodi bolu ona professor voluntáriu balun na’in neen hodi hanorin iha eskola refere.
Enkuantu, professor voluntariu na’in neen ne’e hanesan, reklamante ba disiplina ne’ebé seidauk iha professor.
Tanba ne’e, dadus husi professor na’in neen ne’e, hatama ona ba iha MEJD, atu nune’e, governu bele hare’e no tau matan ba sira, karik MEJD la tau importansia ba problema ne’ebé sira infrenta, ida ne’e sei sai impaktu bo’ot ba estudante sira nia prossesu aprendijazen.
“Durante ne’e ami hato’o ona ami nia preokupasaun ba iha edukasaun munisipiu Bobonaru nian, maibé to’o agora seidauk iha resposta ida mai iha eskola refere inklui Ministériu Edukasaun Juventude no Desportu,” dehan nia
Nia dehan, total estudante iha sentru terseiru siklu EBC Balibo ba tinan ida ne’e hamutuk 513, total professor permanente hamutuk 15, kontratadu 4 no reklamante 6.
Entretantu, tuir planu, iha fulan Novembru tinan ne’e, Governu liu husi Ministériu Edukasaun Juventude no Desportu (MEJD) sei prosesa dadus profesór kontratadu hamutuk 975 ba permantente.
Ministru Edukasaun Juventude no Desportu, Armindo Maia, hateten prossesu rekrutamentu ba profesór 975, agora halo ona verifikasaun dadus, nune’e iha fulan Novembru bele prosesa.
“Agora dadaun ita nia ekipa halo ona verifikasaun, iha fulan Novembru ita verifika hodi bele hanorin estudante sira ne’ebé mak agora daudaun eskola sira pressiza,” Armindo Maia hateten iha Palásiu Governu, Kuarta (13/10).
Nune’e, MEJD sei tau prioridade liu ba profesór sira ne’ebé iha seriedade hodi hanorin, hanesan profesor ne’ebé dedika-an hodi hanorin kleur ona, desde uluk mai to’o agora, ho ida ne’e sira iha ona planu atu rekruta tan profesor 975 atu bele prienxe númeru profesór ne’ebé hahú menus.
Ho planu ne’ebé MEJD iha atu rekruta profesór 975 ne’e, sei aprezenta ba Konsellu Ministru nune’e bele hetan deliberasaun, tanba profesor barak mak tama ona vida reforma, mate, no balun rezigna-an.
