Dom Virgilio: Lider Polítiku Tenke Servisu Hamutuk Featured

By INDEPENDENTE Jullu 24, 2017 1415
Don Virgilio Don Virgilio

DILI:Lider Igreja Katólika iha Timor-Leste husu atu lider partidu polítiku sira tenke fó liman ba malu hodi servisu hamutuk hodi lori nasaun ba oin.

Amu Bispu Dioseze Dili, Don Virgílio do Carmo hatete, iha prosesu kampaña eleitorál kada partidu polítiku habelar programa polítika ba eleitór sira iha territóriu laran tomak, maibé agora to’o eleisaun povu mak sei hili bazeia ba kompromisu sira ne'ebé sira halo.

Nia hatutan, eleisaun remata ona, tanba ne’e iha fulan ida nia laran lider partidu polítiku sira la’o ketak-ketak hodi sosializa programa ukun tinan lima ba povu eleitór sira, maibé eleisaun remata ona kuandu hetan rezultadu ne'ebé hatudu atu partidu sira seluk labele kaer ukun tenke simu.

“Iha tinan lima nia laran tenke fó liman ba partidu ne'ebé hetan oportunidade atu ukun hodi servisu hamutuk para bele lori nasaun ne’e ba oin”, dehan Amu Bispu.

Nia hatutan, ba partidu polítiku sira seluk ne'ebé seidauk bele ukun iha períodu ne’e, ba futuru tenke halo nafatin preparasaun hodi hatudu programa ne'ebé di'ak atu bele mellora di'ak liután eleitór sira nia konfiansa atu ba futuru bele kaer ukun.

Tuir nia, festa demokrasia ne'ebé Timor-Leste halo kada períodu tinan lima sempre iha progresu, tanba sempre aprende, observa no halo avaliasaun hodi hadi'a nafatin erru sira ne'ebé halo. Tanba ne’e, iha períodu eleisaun ne’e hatudu progresu boot ba timoroan tomak tanba esforsu sira ne'ebé tuir duni ema hotu nia espetativa.

Alende ne’e, ulun boot Igreja Katólika mós fó apresiasaun ba sarani no povu Timor tomak ne'ebé iha ona maturidade hodi garante estabilidade iha prosesu kampaña eleitorál ne'ebé la’o di'ak tebes.

Rate this item
(0 votes)

Independente Digital TV