Adjuntu Komisariu KAK ba Prevensaun no Sensibilizasaun Luis de Oliveira Sampaio hatete, tuir lei ema ne’ebé ho salariu $500 ba kraik mak priense rekezitus no kriteria atu bele asesu ba subsidiu uma-kain, no sira ne’ebé boot liu $500 laiha direitu atu hetan.

Maibé, durante KAK akompaña prosesu fahe subsidiu, iha mós funsionariu sira ho salariu liu $500 mak simu subsidiu.

Nia hatutan, iha akompañamentu ne’e, KAK konsege identifika funsionariu 355 ne’ebé hetan subsidiu, ho razaun tanba suku balun iha dadus no suku seluk laiha dadus.

“Monitorizasaun husi munisipiu 8 inklui ho RAEOA ne’e mak ami hetan funsionariu 300 ka 400 ne’ebé asesu ba fundus agregadus familiar ida ne’e,” dehan nia iha nia knar fatin, Farol, Kinta (10/09).

Husi total 355 ne’e, nia dehan, KAK konsege trava na’in 342 hodi la simu subsidiu no na’in 13 konsege simu.

“Lista (na’in) 13 ne’e ami fó hatene tiha ba Ministériu Solidariedade Sosial atu haree ida ne’e hodi husu sira devolve fila fali,” dehan nia.

Aleinde funsionariu públiku, nia dehan, KAK mós identifika benefisiariu 127 ne’ebé simu subsidiu laiha dokumentus komprovativus.

Bazeia ba dadus ne’e, KAK rekomenda ba governu atu koordena ho Ministériu sira ne’ebé funsionariu sira serbisu ba, hodi husu sira devolve fila fali.

“Fó hatene ba sira, favor see mak sente an simu tiha osan ona bele kolabora ka fó fila fali osan,” dehan nia.

Se lae, nia hatutan, ministériu sira bele fó hatene ba Ministériu Finansas atu ko’a sira-nia osan tanba mekanizmu ida ne’e fasil liu.