Porta Voz Sentru Integradu Jestaun Krize (SIJK) Doutór Rui Maria de Araújo hatete, dadus ohin too tuku 12:00 meiudia kazu konfirmadu pozitivu mantein 24.
“Ema ne’ebé rekuperadu ona hamutuk 23 kompostu husi Provavel na’in haat (4) no konfirmadu pozitivu na’in 19, ema na’in 274 maka hein rezultadu teste laboratóriu,”dehan nia liuhusi konferensia imprensa iha CCD, ohin.
Nia informa, pasiente ne’ebé agora dadaun baixa iha fatin izolamentu Vera Kruz falta na’in 5. Sira ne’ebé maka halo teste laboratóriu hamutuk 1.120, na’in 822 maka nia rezultadu negativu.
Ema ne’ebé maka sei iha konfinamentu hamutuk 87 no na’in tolu (3) maka halo auto kuerentena. Sai ona husi konfinamentu 2.181 kompostu husi Dili 1.703 no iha munisipiu 468.
Husu ba komunidade atu kumpri nafatin protokolu husi Organizsaun Mundial Saúde (OMS) nian kuidadu nafatin ijiene pessoal fase liman bebeik mantein distansiamentu sosial nomós distansiamentu fíziku.
Hakmatek iha uma kuandu la iha nesesidade ne’ebé importante iha li’ur. Sai ba li’ur tenke uza maskara.
Nia mós informa, bainhira iha sintomas infesaun respiratória aguda (IRA) hanesan isin manas, kakorok moras, me’ar, inus-been, ruin kiik- bo’ot siin halo favor ba konsulta iha sentru saúde ka ospital sira. Se lakohi atu hetan moras Covid-19 ne’ebé grave ka krítiku hapara fuma sigaru no hemu tua.
