Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, husi kazu foun hirak ne’e iha Dili na’in 49 no 3 husi munisipiu seluk.
“Kazu foun 52 ne’e la iha sintomas ka Asintomatiku,”dehan nia iha komunikadu (26/04).
Nune’e totál kazu konfirmadu kumulativu sura husi 21 marsu 2020 to’o 26 fulan-abril tinan 20201 hamutuk 1949.
Husi total kazu detetadu foun ohin iha na’in 36 mak deteta liuhusi teste ho razaun atu halo viájen/ka halo ona viájen ba Munisípiu hafoin deteta pozitivu. Maski nune’e sira ne’ebé rezultadu teste pozitivu, sira-nia hela fatin iha Díli iha duni cluster sira ne’ebé iha kazu detetadu barak.
Ho nune’e kazu rekuperadu iha na’in 18 no kazu ativu sa’e ba 1050.
Husi horiseik (25/04) mai ohin (26/04) teste PCR ne'ebé Laboratóriu Nasionál Saúde halo hamutuk 399, ho detallu hanesan tuir mai, Vijilánsia sentinela: 12, Rastreiu ba kontaktu (Contact tracing): 9, Rastreiu Aleatoriu (Random Screening): 65, Viájen sai husi serka sanitária husi Dili: 220, Viájen internasionál: 42, Follow up iha kuarentena: 51, Teste follow up ba sira iha izolamentu: 59 (18 negativu ona, 41 sei nafatin pozitivu).
Informasaun adisonal iha loron 26 fulan-abril izolamentu Vera Cruz iha kazu detetadu na'in 20, iha área obstetrisia na'in 7, medisina interna 10, no pediatria 3.
Sira na'in 7 iha obstetrisia kategoria moderadu hotu, sira-nia kondisun estável.
Na'in 10 iha medisina interna iha na'in 3 grave, 7 moderadu. Na'in 3 grave ne'e iha 1 maka uza ventiladór maibé rekopera di'ak kompara ho loron hirak liubá. Na'in 2 seluk uza oksijéniu ho mask.
Husi sira na'in 9 iha medisina interna ne’e, na'in 4 maka tama ho ARDS (Acute Respiratoric Distress) ka Sindroma Insufisiénsia Respiratória Aguda, plus iha komorbidade, na'in 5 tama ho ARDS no laiha komorbidade.
Kazu 3 pediatria, iha 2 grave no 1 moderadu. Na'in 2 grave uza CPAP, no na'in 1 moderadu uza oxijéniu ho mask.
Hakarak mós informa ba públiku tomak katak laiha diferensa entre aplikasaun medidas saúde públika hodi prevene no mitiga surtu COvid-19 entre Díli ho Munisípiu siraseluk no RAEOA.
“Ema ruma sai husi Dili ba Munisipiu seluk ho RAEOA, maski lori ona rezultadu teste PCR, tamba Dili ninia númeru kazu aumenta maka’as iha fulan 2 ikus, autoridade saúde sira iha Munisipiu sira seluk no RAEOA, nafatin bele husu atu kuarentena no repete test PCR, bainhira sira avalia katak ema ne’ebé halo viájem ne’e, tama iha kategoria risku atu hada’et tutan moras ba populasaun iha fatin nabá (favór haree insidénsia iha Dili, hanesan temi ona iha leten)”,tenik nia.
Medida hirak ne’e autoridade saúde sira foti atu PREVENE vírus SARS-CoV-2 lahada’et tutan maka’as liutan iha Munsipiu sira no RAEOA ne’ebé tuir klassifikasaun transmissaun OMS nian, hanesan bele haree iha tabela iha leten, sei nafatin kazu esporádiku, ka kazu iha kluster.
SIJK informa mós ba públiku katak liuhusi kanál diplomatiku ne’ebé Timor-Leste iha, autoridade kompetente sira husu ona esklaresimentu bá autoridade sira iha Malázia kona-ba razaun loloos repatria hikas Timor-oan na'in 35 ne’ebé halo tranzitu iha Kuala Lumpur Malázia ho destinu Inglaterra. bainhira iha ona esklaresimentu ofisiál husi autoridade Malázia, mak sei informa mós públiku.
Dadus mundial Covid-19 iha loron horseik (25/04), kazu foun 146.054.107 no mate na’in 3.092.410.
Jornalista:Saturnina da Costa
Editor:Jose Sarito Amaral
