Segunda, 27 Setembru 2021 | Login
Deputaddu FRETILIN Branco Deputaddu FRETILIN Branco

CNRT Laiha Politika Seriu Hakotu Impase Politika Featured

DILI:Bankada FRETILIN konsidera Partidu CNRT laiha politika seriu atu halo diálogu hodi bele buka solusaun ba impase politika ne’ebé la’o ona durante tinan tolu.

Vise Prezidente Bankada FRETILIN, Francisco Miranda Branco hatete, atu solusiona impase politika, CNRT tenke iha vontade politika ba diálogu.

“Ami hanoin diálogu di’ak tebes, dezde uluk ami dehan diálogu ne’e importante  ba fusionamentu estadu ida ne’e nian, maibé reasaun CNRT halo konferensia ida katak lakohi diálogu, agora husu diálogu iha momentu ida ne’ebé sira rasik no bankada ne’e rasik hato’o pedidu ida ba Prezidente Repúblika,” dehan nia.

Depois, nia hatutan, sira husu Prezidente Repúblika atu konvoka enkontru ho FRETILIN no CNRT, maibé sira fila kotuk hodi provoka impase ida husi 2017  hodi lakohi viabiliza VII Governu ne’ebé forma husi Partidu FRETILIN no PD.

“Sira (CNRT) dehan minoria labele ukun, maibé minoria mós bele ukun se ita politika seriu, ita respeita vontade povu nian, ita fó oportunidade. Maibé situasaun ne’e la akontese, sira kria koligasaun ida hodi impede programa VII Governu nian, entaun impase ne’e mai husi ne’ebá to’o agora”.

Kona-ba deklarasaun Bankada CNRT atu buka solusaun ba impasse politika, Branco dehan, deklarasaun bankada CNRT laos tarde, maibé sira la seriu, tanba situasaun ne’e FRETILIN uluk hakarak diálogu.

“Partidu FRETILIN dezde uluk hakarak iha diálogu, ne’e laos partidu boot de’it, maibé partidu kiik sira mós bele tama hotu iha diálogu ne’e. Mais reasaun mai husi CNRT nia lakohi diálogu, depois iha Parlamentu Nasionál sira dehan diálogu la hakerek iha konstitusaun,” nia hatete.

Entretantu, hatan kona-ba pozisaun FRETILIN ba governu konstitusional daualu ne’ebé lidera husi Primeiru Ministru Taur Matan Ruak, Branco dehan, pozisaun FRETILIN klaru ona atu viabiliza VIII Governu nia mandatu to’o 2023.

“Ami lakohi ita husik hela ba estadu TL kada tinan rua ba eleisaun. Entaun ami-nia pozisaun mak ne’e viabiliza governu ida ne’e nia mandatu to’o remata,” nia afirma.

Read 1793 times
Rate this item
(0 votes)