Brunei Hakarak Investe Hotel no Turizmu iha TL Featured

By Cristina Ximenes Outubru 11, 2023 1105
 Embaixadór TL ba Brunei, Abel Guterres. Foto:Media PR. Embaixadór TL ba Brunei, Abel Guterres. Foto:Media PR.

DILI: Kompañia nasaun husi Brunei hakarak halo investimentu ba hotel no turizmu iha Timor Leste, maibé sei hein akordu husi governu.

Embaixadór TL ba Brunei, Abel Guterres informa, ohin mai akompaña kompañia husi Brunei ne'ebé sei mai halo investimentu iha Timor Leste no sira mai dala haat ona.

Nia dehan, ohin hasoru malu ho Prezidente Repúblika José Ramos Horta ne'e hodi fó mós brifing ba Xefe Estadu kona-ba ninia vizita Estadu ba iha Brunei fulan tuir mai.

“Investimentu iha área turizmu, turizmu ne'e signifika tenke halo hotel aeroportu liu-liu zona Baukau, inklui Dili mós halo dezenvolvimentu iha tasi ibun no buat seluk ne'ebé Governu Timor Leste hakarak sira prontu halo, agora sira iha hela preparasaun atu halo akordu ho Governu Timor Leste atu halo investimentu iha TL," informa Embaixadór Timor Leste ba Brunei, Abel Guterres ba jornalista sira hafoin remata enkontru ho Xefe Estadu iha Palasiu Prezidensia Bairu-Pite, (10/10).

Nia hatete, atu to'o iha ne'eba tenke iha preparasaun uluk se preparasaun loos ona tenke la'o ba oin ho asina akordu. Tanba Brunei sei iha planu atu halo investimentu iha área turizmu iha área oi-oin.

Hanesan hotelaria, restaurante, nune'e mós hahán ezemplu turista sira juta ida tama Timor tinan-tinan hahán mai husi ne'ebé, buat sira ne'e mós fó oportunidade ba agrikultura sira atu halo produsaun.

Nia esplika, se iha Timor la halo produsaun tenke foti hahan husi liur, se foti husi liur, entau osan halai ba li'ur ne'e hola parte iha investimentu ne'ebé bo'ot, tanba presija hotel barak.

"Ita agora atu tama ASEAN tenke iha hotél, hospitál internasional, tenke iha sentru konvensaun realiza konferênsia bo'ot sira, portantu iha área sira ne'e mak sira hakarak halo investimentu, agora daudaun servisu la'o daudaun ona hein katak to'o loron ne'ebé mákina komesa sira halo movimentasaun," hatete nia.

Tanba, investimentu ne'e bainhira hahú ida ona, komesa ona fó dalan ba buat seluk tanba hotu-hotu kait malu, ida mesak labele ezemplu iha hotél de'it mak laiha aeroportu aviaun para iha ne'ebé, se aeroportu kiik ema mai uitoan de'it entaun presija ekosistema.

Nia afirma, ekosistema ne'e hanesan  ba Singapura no Indonézia no Bali iha sasan barak, Timor mós agora iha prosesu atu ba iha ne'eba.

Entretantu, iha enkontru ne'e Prezidente Repúblika José Ramos Horta hatete, sente kontente hasoru malu ho embaixadór inklui mós investór sira husi Brunei, no Xefe Estadu mós apoiu ideia sira no servisu ne'ebé Brunei atu halo liga ho investimentu ne'ebé sira halo iha Timor Leste.

Xefe Estadu hatete, nia mós sei halo vizita Brunei, Timor Leste ho Brunei rai kiik rua iha ASEAN nia laran, tanba ne'e mak rai kiik rua ne'e mak la'o hamutuk sai furak liu tan.

Rate this item
(0 votes)
Last modified on Kinta, 12 Outubru 2023 17:02

Independente Digital TV