Sexta, 24 Setembru 2021 | Login
Ministra Solidariedade Sosial no Inkluzaun (MSSI), Armanda Berta ho Diretor Jeral esplika hela kona-ba programa Bolsa da Mae ba Bebe idade 0-6. Foto Independente. Ministra Solidariedade Sosial no Inkluzaun (MSSI), Armanda Berta ho Diretor Jeral esplika hela kona-ba programa Bolsa da Mae ba Bebe idade 0-6. Foto Independente.

Bebé Idade 0-6 Sei Hetan Bolsa da Mae

DILI:Tuir planu Ministériu Solidariedade Sosial no Inkluzaun (MSSI) tinan 2022, sei implementa Bolsa da Mae ba jerasaun foun hahú husi idade bebé 0-6 ho osan kada fulan dollar amerikanu $20.

Programa ne’e ho objetivu, atu redus má-nutrisaun no ki’ak iha Timor-Leste. Faze dahuluk sei implementa iha Munisipiu tolu (3) hanesan, Ainaru, Bobonaru, inklui RAEOA-Oekusi.

Diretór Jerál-MSSI, Rui Expostu esplika, programa ne'e implementa atu redus insedénsia pobreza no hadia saúde nutrisaun inan no labarik.

“Programa foun ne'e ita konsentra ba Bolsa da Mae jerasaun foun, ita investe uluk ba inan isin rua no primeiru inan infansia,”dehan Diretór ne’e, hafoin enkontru ho Parseiru Dezenvolvimentu, iha Hotel Timor (22/07).

Aliende ne’e, sei fó subsidiu adisionál mós ba labarik ho defisiensia sira. Bebé ne’ebé moris mai ho kondisaun difisiensia sei hetan tan subsidiu osan adisionál $10, nunee hamutuk $30.

“Pagamentu ne'e sei halo kada fulan ida ou fulan tolu dala ida, fó osan ne'e ho razaun katak inan isin rua bele sosa hahan ne'e nutritivu, atu nune'e labele hetan má-nutrisaun,”dehan nia.

Kona-ba prosesu administrasaun atu hetan Bolsa da Mae sei simplifika, atu bele asesu lalais ho programa ne'e rasik.

 

Asistente Editor: Saturnina da Costa

Read 6433 times
Rate this item
(0 votes)