Xefe Bankada CNRT, Patrocino Fernandes hatete, nia aseita atu halo auditoria bar o Haksolok atu nune’e bele fó sai lia loos ba públiku no evita uza asuntu ne’e ba interese politiku nian.

“Mais see mak bele halo auditoria no see mak bele iha kompetensia atu halo audotoria ne’e mak Governu,” dehan Patrocino, iha Parlamentu Nasionál, Tersa (04/11).   

Tuir nia, governu sei haree hela posibilidade atu halo auditoria ba kazu refere.

“Mais ha’u hatene katak Governu halo hela daudauk auditoria ba buat lubuk. Ha’u mós la hatene karik integra ida ne’e (ró Haksolok), ha’u labele hatene,” deputadu ne’e dehan.

Maibé, iha prinsipiu, nia esplika, auditoria ne’e parte ida husi governasaun di’ak no importante atu bele asegura transparansia no governasaun di’ak.

Molok ne’e, Eis Prezidente Autoridade Rejiaun Administrativu Espesial Oekuss-Ambeno, Mari Alkatiri hakarak atu loke auditoria internasional hodi halo auditoria ba ro Haksolok ne’ebé daudauk ne’e sai polemika.

Eis Primeiru Ministru ne’e hatete, prosesu auditoria husi kamara kontas halo tiha ona, no prosesu ne’e to’o ona iha tribunal maibé absolve total.

"Husi auditória mai, ha'u hakarak de'it, ita hotu aseita auditória ne'e ninia relatóriu, laos to'o ona, la gosta fali, ne'e sala hotu," dehan Alkatiri ba jornalista sira hafoin fila husi Portugál, iha sala VIP Aeroportu Internasionál Nicolau Lobato Komoro, Segunda (27/10).

Tan ne’e, tuir atual Sekretariu Jeral Partidu Fretilin ne’e, nia prontu bainhira halo fali auditoria internasional ida ba kazu ne’e.

"Agora ne'e hakarak halo auditória internasionál, aban-bainrua atu halo auditória Maromak nian karik, mais Maromak hatene ona see mak sala, see mak loos," dehan nia.

Entretantu, Prokuaradór Jerál Repúblika, Nelson de Carvalho hatete, kazu ro Haksolok ne’e kompleksu tebes. Maske nune’e prosesu investigasaun ba kazu ne’e antize ona porsentu 70 no hela porsentu 30 atu konklui prosesu refere.

Prokuradór Nelson dehan, kazu ro Haksolok iha hela prosesu investigasaun no mosu tan ona faktus foun iha prosesu refere ne’ebé aumenta ninia komplesidade.

“Kazu ne’e  iha  faze investigasaun, tanba  mosu tan  faktus foun, iha prosesu kazu ne’e mosu tan kazu barak," dehan Nelson hafoin audensia ho Komisaun A, iha Parlamentu Nasionál, Segunda (20/10).

Maske lori tempu narauk, maibé, nia dehan, prosesu investigasaun ba kazu ne’e atinze ona porsentu 70.

Kona-bá see de’it mak envolve iha kazu ne’e, Prokuradór ne’e hili atu lakohi fó komentariu ho razaun sei iha hela faze investigasaun.