Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo, hatete kazu foun ne’ebé relata ohin iha Dili 203, Vikeke 39, Covalima 7, Aileu 2, Ainaro 1 no Bobonaro iha 1.
Totál komulativu kazu konfirmadu sura husi loron 21 fulan-Marsu tinan 2020 to’o loron 13 fulan-Maiu 2021 hamutuk 3,879.
Ho nune’e, dadus jéral ba loron ohin (13/05), kazu foun na’in 253, kazu rekuperadu na’in 162, kazu ativu iha izolamentu hamutuk 1,818 no kazu óbitu iha na’in 3.
Husi horiseik (12/05) mai ohin (13/05) teste PCR ne'ebé Laboratóriu Nasionál Saúde halo iha Dili hamutuk 984 kompostu husi, Vijilánsia sentinela na’in 48, Rastreiu ba kontaktu (Contact tracing) na’in 75, Rastreiu Aleatoriu (Random Screening) iha 487, Viájen sai husi serka sanitária husi Dili hamutuk 319, Viájen internasionál na’in 21 no Follow up iha kuarentena iha na’in 24.
Total testes PCR ne’ebé halo horseik (12/05) iha munisípiu sira seluk RAEOA no HNGV hamutuk 559 ho detallu hanesan tuir mai ne’e, Ermera na’in 107, Maubisse 91, Suai 124, Maliana 4, Baucau 131, Vikeke 45 no HNGV hamutuk na’in 57.
Entretantu,iha sala Izolamentu vera Cruz ohin loron halo tratamentu ba kazu detetadu hamutuk na'in 33, fahe ba Obstetrísia na’in 11 no medisina interna na’in 22.
Na'in 11 iha obstetrísia kategoria moderadu hotu no sira-nia kondisaun estáve. Husi na’in 22 iha medisina interna, na’in 8 grave (1 uza ventiladór, 2 uza CPAP, 5 uza oksijeniu) na'in 14 moderadu.
SIJK, informa mós ba públiku katak husi kazu detetadu sira ne’ebé presiza izola-an hodi labele hada’et tutan ba ema seluk, hahú iha loron 1 fulan-abril tinan 2021, iha 209 kazu detetadu mak hetan autorizasaun husi Ministériu Saúde atu hala’o izolamentu iha uma-rasik.
Husi total ne’e, na’in 70 maka alta ona, ka bele ona deklara rekuperadu.
Enkuantu, ema ne’ebé mate ho Covid-19 iha Timor-Leste hamutuk na’in 8.
Tuir dadus mundial ba loron ohin (13/05), ema ne’ebé hetan positivu Covid-19 hamutuk 159,949,065 no kazu mate hamutuk 3,322,439.
Asisten Editor: Saturnina da Costa
