Atuál Covid-19: Entre Kazu Foun 13, Doutór Ida ho Nia Oan Na’in 2 Featured

By Saturnina da Costa Marsu 09, 2021 2526
Ekipa Mediku iha EE Dahuluk. Foto: Independente Ekipa Mediku iha EE Dahuluk. Foto: Independente

DILI:Ekipa Konjunta Saúde husi Sentru Integradu Jestaun Krize (SIJK) deteta tan kazu foun hamutuk-13 inklui professional saúde (Doutor) na’in ida ne’ebé hala’o kna’ar iha Hospitál Nacional Guido Valadares (HNGV) ho nia oan na’in-rua ne’ebé hela mós iha bairro BTN2, Tasi Tolu Dili.

Doutór ho nia oan na’in rua ne’e besik pasiente feen-ho-laen ne’ebé tama ona iha sala izolamentu Vera Kruz, Dili.

Vise Koordenador Sentru Integradu Jestaun Krize (SIJK), Odete Maria Viegas, pasiente foun Covid-19 na’in 13 ne’e inklui hirak ne’ebé iha kontaktu ho kazu na’in-ida iha Bebonuk no na’in-ida husi feen ho laen ne’ebé servisu iha Sekretaria Estadu Formasaun Profesionál no Empregu (SEFOPE).

“Bainhira ekipa konjunta saúde buka tuir ema hirak ne’ebé kontaktu besik ho kazu husi BTN2, iha SEFOPE deteta ema na’in-9, na’in-1 husi Bebonuk ne’ebé antes ne’e ekipa deteta estudante-1no na’in-3 iha professional saúde ho nia oan na’in-2,”dehan Vise Koordenador SIJK ne’e liu husi konferénsia ba imprensa ne’ebé hala’o iha Sala Situasaun SIJK, CCD, Tersa ohin (9/3).

Doutora Odete haktuir, resultadu screening ba iha fatin sira ne’ebé deteta kazu pozetivu hanesan BTN2, SEFOPE, no Saneamentu (ekipa raut foer) total hamutuk 471.

Nune’e, nia klarifika, ekipa foti amostra iha SEFOPE hamutuk 28, deteta na’in-9 mak pozitivu; amostra husi Bebonuk hamutuk-51 deteta na’in-1 pozitivu; no husi HNGV deteta ema na’in-3 inklui doutor ida ho nia oan na’in-2, no ekipa horikalan halo kedas teste ba professional saúde sira hamutuk 32 maibé hatudu resultadu negativu.

Ho dezenvolvimentu kazu pozitivu iha kapital Dili, Doutora Odete konsidera situasaun atuál  obriga ema hotu nia atensaun ho sériu.

Nia dehan, ekipa konjunta kontinua tún ba terrenu hodi identifika nafatin ema hirak ne’ebé iha kontaktu ho sira hotu ne’ebé deteta ona pozitivu nune’e bele prevene lalais trasmisaun lokal ho lalais liu.

Ekipa sira halo nafatin swap ba ema sira ne’ebé iha relasaun ho kazu pozitivu iha loron hirak liu ba.

Entretantu, husi kazu foun 13 ne’e sura hamutuk total pasiente Covid-19 ne’ebé agora izola hela iha sala izolamentu Vera Kruz hamutuk 48.

Doutora Odete kontinua apela ba sidadaun hotu liuliu ema sira ne’ebé nia oan eskola iha Canossa, Cafe Timor Balide, International school iha Embaxada nia kotuk iha relasaun ba oan sira ne’ebe positivu hodi ba sentru saúde hodi halo teste swap.

“Situsaun agora bolu ita hotu nia atensaun, labele paniku,” Doutora Odete afirma.

Husu ba populasaun iha Dili laran tomak atu nafatin kalma, lalika pániku, hela deit iha uma wainhira laiha nesesidade atu halo movimentu bá-mai, pratíka nafatin medida sira ne’ebé ita hotu hatene ona:

  1. a) Uza máskara
  2. b) Fase liman bebeik ho sabaun ka dezinfetante ruma
  3. c) Wainhira kumprimenta malu, lapresiza kaer-liman, bensa-liman, rei-malu ka haku’ak malu
  4. d) Evita halibur malu barak

e) Hamri’ik ka tur dook husi ema seluk, mínimu metru ida ho balu

Rate this item
(0 votes)

Independente Digital TV