Iha jogu final, Devia konsege halakon ninia adversariu ho pontu 2-0 hodi foti Timor-Leste nia naran.

“Ha’u kontente tanba bele rekolla medalla osan-mean iha final, tanba ida ne'e ha'u-nia tarjetu hodi oferese medalla ba Timor-Leste," dehan nia ba jornalista sira, iha Ginaziu Dili, Segunda (21/07).

Devia sente orgullu ho tanba bele halakon atleta husi Portugal no Angola.

Iha fatin hanesan, Prezidente Federasaun Taekwondo Timor-Leste, Gabriel da Costa, sente orgullu tanba Devia bele hetan medalla osan-mean.

"Tanba ne'e ha'u konsidera ita-nia federasaun iha kapasidade atu prepara atleta sira ba eventu internasionál iha futuru. Ida ne'e primeira vez atleta husi federasaun Taekwondo hetan osan mean iha jogu CPLP, ne’e hanesan motivasaun ba ami hotu atu kontinua treinamentu no fó oportunidade ba atleta sira atu reprezenta Timor-Leste,” dehan nia.

Klasifikasaun final modalidade Taekwondo feto – klase 46kg mak: Deovia Bareto da Silva (TL) – medalla osan-mean; Gabriela Filipa da Silva Mendes (Portugal) – medalla osan-mutin; no Jasmin Cassia (Angola) ho Liliana Chaurumbo (Moçambique) medalla osan bronze.

Nelio oferese medalla osan-mutin

Atleta Taekwondo, Nelio dos Santos, oferese medalla osan-mutin iha modalidade taekwondo kategoria mane ho kilograma 55.

Nelio hatudu performa ne’ebé forte no dignu, iha kompetisaun final atu hetan osan-mean maibé la konsege tanba lakon ho atleta husi Portugal, Gustavo Valentim da Conceição Fernandes.