Nia haktuir, prosesu finansa sei haree no tetu hela, nune’e governu sei ko'alia ho setór privadu, tanba saláriu mínimu sei hare ba buat rua, salariu ba traballadór sira iha li'ur no governu nian.

" Konsellu Ministru orienta hela parte kompetente hodi estuda hela, depois maka ita sei haree," informa Mariano Assanami Sabino ba jornalista sira hafoin remata partisipa konferénsia internasionál kona-ba mudansa klimátika ne'ebé realiza husi FONGTIL iha Salaun Canossa Has Laran, Manleuana, (21/07).

Nia klarifika, governu nian mak sei fó impaktu mós ba veteranu sira nia osan, maibé iha li'ur ne'e laiha.

Iha fatin hanesan, Diretór Ezekutivu FONGTIL, Valentim da Costa Pinto hatete, saláriu mínimu iha tinan barak nia laran, komité nasionál traballu ne'ebé lkompostu husi Sindikatu Traballu, Governu ho Setór Privadu halo ona pareser lubuk ida hodi submete ba Parlamentu Nasionál no Governu atu bele deside kona-ba saláriu mínimu.

" $ 115 ne'ebé ita hanoin tenke muda ba $150 ne'ebé la'o ona, maibé iha tinan kotuk desizaun balun ne'ebé Konselu Ministru halo, kontinua la aprova rekomendasaun ida ne'e. Entaun ami hanoin katak, ne'e tenke konsidera iha mudansa ruma kona-ba ida ne'e, mais di'ak liu ita tenke hanoin ona kona-ba aplika saláriu justu," haktuir nia.

Nia haktuir, saláriu mínimu hatene $150 mais kondisaun merkadu, movimentu sira ne'ebé ladun adekuadu mak nafatin afeta ba kapasidade kompras ninian.

Nia hatutan, entaun governu bele haree to'ok, konsidera ida ne'e tau iha prátika tanba iha tinan balun ba kotuk, bainhira hahú tama iha faze kampaña partidu hotu-hotu bele ko'alia, halo nusa mak ko'alia kona-ba mudansa traballadór sira iha rai.

Maibé, la'ós ko'alia kona-ba saláriu de'it mais, akompañamentu ba maluk sira ne'ebé servisu ho empregadór sira, presiza mós tenke akompaña ne'ebé di'ak nune'e evita violasaun sira labele akontese.

"Ita nia traballadór sira barak mós laiha direitu asesu ba seguransa sosial, tanba ema ne'ebé fó servisu lakohi selu, ida ne'e hanesan buat ruma ne'ebé tenke sai ona asuntu, la'ós ezije de'it saláriu ne'e tenke sa'e, mais kondisaun ne'ebé bele permite traballadór hetan ne'e tenke hetan," hatutan nia.

Justisa ne'e tenke iha, loos duni tempu sira hanesan ne'e hotu-hotu presiza buka servisu, mais servisu tenke ho dignu, adekuadu, nune'e ita bele asegura traballadór sira nia direitu ba buat ruma ne'ebé nia hetan.