Prezidente em Subtituisaun no atual Vise Prezidente AES-PNTL, Laticha Valente Goncalves informa, AES-PNTL eziste iha 27 Abril 2023 no hetan ona legalidade iha Outobru 2024 né'ebe konsagra iha dekretu lei nu.34/2024, iha organika PNTL iha artigu 629 né'ebe mak deskreve papel AES-PNTL hanesan parseria Institusional, suporta tarefas sira hodi valoriza familiares no matérias relasiona ho apoiu bem-estar PNTL nian.

Asosiasaun ne’e, nia dehan, sei hasoru problema no difikuldade barak ne'ebe mak persiza hetan tulun husi governu, liu-liu husi ministeriu Interior.

Ho nune’e, AES-PNTL realiza seminariu nasional ida hodi konvida Primeiru Ministru, Kay Rala Xanana Gusmão, Sekretariu Estadu Igualdade, Parlamentu Nasional no entidade seluk atu bele diskuti hamutuk hodi bele lori asosiasaun ne’e ba iha oin.

"Ami kontinua buka nafatin atu hetan formas no prosedimentu balun husi parte kompetente sira hodi bele enkamiña no reforsa ami-nia servisu esensial sira ne'ebé mak sita ona iha previu, hodi bele kontinua fó espiritu devosaun ba ami espoza no espozu sira, hanesan membrus estadu RDTL, hahú husi ofisiais dirijentes to'o ajentes sira," dehan Laticha, iha nia diskursu iha Sentru Konvensaun Dili, Tersa (06/05).

Maske nune’e, nia enkoraja atu kontinua fortalese asosiasaun ida ne'e hodi partisipa ativamente iha kualkuer atividades, ho hotu-hotu nia inisiativas no inovasaun hodi atinze mehi asosiasaun nian.

Iha biban ne’e, Laticha hato’o mós pedidu ualu ba governu, mak hanesan:

Ida, kria decreto governu ida ba tranferensia membru PNTL (laen/feen sira) atu ninia espoza/espozu no oan sira bele mos hetan mudansa servisu no estudu, hodi fó apoiu nafatin iha fatin kolokasaun foun, ho razaun asegura fator ekonomia no armonidade iha familia.

Rua, kria diploma ministerial ida kona-ba deskrisaun servisu ba papel esensial AES-PNTL, nune'e bele halao servisu haktuir normas no provedimentu legal sira.

Tolu, kria formasaun espesifiku ba espoza ka espozu sira hodi aumenta sira-nia koñesimentu, liu-liu iha abilidade lideransa sira, abilidade komunikasaun, abilidade kriatividade, no seluk-seluk tan hodi mellora servisu no familla iha futuru.

Haat, kona-ba governu nia apoiu subsidiu ja abono familia hodi bele responde nesesidade familia nian ho di’ak, nune'e labele hamosu dezentedimentu iha familia.

Lima, husu ba nono governu atu apoiu transporte ba nivel nasional, unidades, no nunisípiu sira hotu.

Neen, apoiu fatin servisu ne'ebé adekuadu iha Komando nasional, unidade to'o munisipiu sira.

Hitu, apoiu fornesimentu fardamentu ba AES-PNTL kada tinan rua (2).

Ualu, apoiu fundus espesial ba atividades husi nasional, unidade no nunisipiu sira.

"Rekomendasaun ne'ebe ami sita iha klauzula nümeru ida to'o ualu ne’e hodi bele ajuda ami atu suporta bem estar iha familia boot PNTL, no mós vantajen ba komunidade sira atravez husi asuntu sosiál, kultural no edukasional,” dehan nia.

Iha fatin hanesan, Primeiru Ministru, Kay Rala Xanana Gusmão, husu ba Asosiasaun Espoza/Espozu Polisia Nasional Timor-Leste (AES-PNTL) atu kontinua hametin armonia entre ema hotu no hakbesik aan ba komunidade sira.

"Ha'u hetan konvite mai partisipa iha segundo aniversariu AES-PNTL nian, di'ak tebebes, sira tinan rua tiha ona. Sira buka atu hametin armonia, la'os de'it iha uma laran mais entre sira hotu iha Timor laran tomak. No mós hakbesik aan ba komunidade sira ne'ebé besik sira hodi rezolve problema balun iha sosiedade,” dehan Xanana.

Xefe Governu ne'e konsidera ezistensia AES-PNTL ne’e di’ak tebes no iha tinan oin mai sira hametin tan sira nia kbi'it, la'os de'it iha konesimentu, maibe iha area oioin.

"Asosiasaun ne'e di’ak tebtebes, husu ba komisariu atu apoiu sira, tanba sira la tama iha PNTL, ho ida ne'e bele ajuda sira nia laen ka feen iha PNTL hodi bele kumpre missaun no kria armonia, pas no estabilidade," dehan nia.