Prezidente Bankada CNRT, Arão Noe de Jesus hateten, uluk VI Governu sira hasai kritika makaas estrutura governu nian.

Nune’e, Mari Alkatiri mós promete dehan atu halo ki’ik estrutura governu ho másimu membru 30, maibé realidade hatudu oin seluk. Membru governu agora aumenta to’o 33. Númeru ne’e seidauk konta ho pose ba datoluk nian.

“Iha tempu ne’ebá (governu anteriór) ita kritika, maibé ikus mai mós ita ezekuta”, dehan Arão, iha Uma Fukun PN, horisehik.

Iha fatin hanesan, Vise-Prezidente FRETILIN, Francisco Miranda Branco hatete, polítika FRETILIN nian antes ne’e hakarak atu hakiik estrutura governu, maibé tanba la manan maioria, polítika ne’e la konsege implementa.

“Kompromisu FRETILIN hateten formasaun governu ho membru 30 efisiente no efikásia ona. Maibé, tanba iha interese ba povu nian hodi halo inkluzaun ne’e mak realidade ne’e”, tenik nia.

Nia hatutan, estrutura governu ne'ebé sai boot ne’e kauza husi ukun hamutuk ne'ebé ema hotu hatene kona-ba Governasaun inkluzaun ne’e hakarak ka lakohi estrutura ne’e tenke boot.

Iha fatin hanesan, Prezidente Bankada (PD), Maria da Silva Gusmão hateten, kompozisaun governu boot ne’e hatudu ona iha istória anteriór, nune’e iha posibilidade bele liu tan.

Nia dehan, governasaun bele boot, importante mak responsabilidade ba servisu ho efisiénsia no efikásia tuir programa ba interese povu nian.