Arão Dehan Laiha Konvite PR Lú Olo Ba Roma, AMP La Tuir Plenária Featured

By INDEPENDENTE Outubru 31, 2018 2592
Prezidente Parlamentu Nasionál (PPN) Arão Noe Amaral hala’o enkontru mensál ho Prezidente-da-Repúblika Francisco Guterres Lú Olo, hodi relata funsionamentu Parlamentu Nasionál nian. FOTO: PR Prezidente Parlamentu Nasionál (PPN) Arão Noe Amaral hala’o enkontru mensál ho Prezidente-da-Repúblika Francisco Guterres Lú Olo, hodi relata funsionamentu Parlamentu Nasionál nian. FOTO: PR

DILI: Prezidente Parlamentu Nasionál (PN), Ãrao Noe de Jesus, hateten, viajen Prezidente Repúblika, Francisco Guterres ‘Lú Olo’ atu ba Vatikanu-Roma laiha konvite ruma husi Amu Papa, maibé nu’udar inisiativa privadu husi Xefe Estadu.

“Prezidente Repúblika dehan katak laiha konvite ida husi Amu Papa”, tenik Arão, iha Palásiu Prezidensiál, horisehik.

Tuir nia, desizaun husi Núnsiu Apostóliku promete katak pedidu ne’ebé Prezidente Repúblika nian Amu Papa konkorda no fiksa atu bele hasoru malu iha loron 23 Novembru.

Arão hatutan, Prezidente Repúblika espresa katak dezde simu pose hakarak ba vizita Roma halo enkontru ho Papa no konvida Amu Papa mai Timor.

Ne’e duni husu ba publika labele halo komentáriu oioin tanba bainhira Vatikanu konfirma bele prejudika Estadu.

PR Lú Olo Atu Kumpre Konvite Amu Papa

Entretantu, antes ne’e. Amu Bispu Dioseze Baukau, Don Basílio do Nascimento hasoru malu ho Prezidente Repúblika, Francisco Guterres ‘Lú Olo’ hodi ko’alia kona-ba konvite husi Amu Papa Francisco atu vizita Vatikanu.

Soru-mutu ne’e hala’o hodi hatutan konvite Amu Papa ba Prezidente Repúblika atu vizita Vatikanu ne’ebé Núnsiu Apostóliku Joseph Marino tranzmite. Núnsiu Apostóliku informa katak data ne’ebé markadu ba vizita Prezidente Repúblika iha Vatikanu mak loron 23 Novembru 2018.

Prezidente Repúblika sei hato’o konvite ba Santu Padre Francisco atu vizita Timor-Leste nu’udar nasaun Katóliku ho proposionalmente boot liu iha mundu.

Núnsiu Apostóliku, Joseph Marino, hala’o enkontru enkontru ho Prezidente Repúblika semana hodi hateten, vizita ba Vatikanu nu’udar vizita espirituál no peregrinasaun ida, la’ós polítiku, ekonómiku no militár. Núnsiu Apostóliku espera Prezidente Repúblika sei hetan autorizasaun husi Parlamentu Nasionál atu bele halo vizita ne’e.

AMP Lakohi Vota

Entretantu, iha plenária Parlamentu Nasionál kona-ba votasaun ba dezlokasaun Xefe Estadu nian ba Roma la konsege diskute tanba grupu partidu koligasaun governu husi Bankada CNRT, PLP no KHUNTO abandona plenária hodi lakohi vota.

Presidente PN, Arão Noe de Jesus hatete, ajenda plenária inskreve atu fó votu aseitasaun ba dezlokasaun Xefe Estadu nia ba Vatikanu, maibé kuorum deliberativu la to’o deputadu 33, ne’e duni, tenke adia ba tempu seluk.

“Ita tenke adia ajenda ba votu aseitasaun ba viajen Xefe estadu nian ba iha loron seluk, tanba la prienxe kuorum atu halo desizaun”, dehan nia, liu husi plenária PN, PN horisehik.

Nia esplika, deputadu sira husi bankada CNRT, PLP no KHUNTO la marka prezensa tanba tuir informasaun sira hala’o hela enkontru partidu nian.

Haree ba situasaun ne’e, Vise-Prezidente Bankada Partidu Demokrátiku (PD), Adriano Nascimento hatete, Prezidente Repúblika atu halo vizita Estadu hodi hasoru lider Igreja Katólika hanesan Santu Papa ne’e importante tebes tanba povu Timor maioria relijiaun Katólika.

“Ita la fó importánsia hodi abandona plenária ne’e ha’u nia haree ladún furak ba Estadu Timor no la furak ba sarani Katólika iha Timor”, dehan nia.

Nia hatete, iha aspetu relijiaun nian CNRT, PLP no KHUNTO husik plenária hanesan jestu ida rejeita dezlokasaun Xefe Estadu nian ba estranjeiru.

Iha fatin hanesan, Deputadu Bankada FRETILIN, David Dias Mandati hatete, Xefe Estadu hanesan pesoa eminente iha Estadu RDTL, tanba ne’e sai hanesan figura númeru ida ba diplomasia entre nasaun ho nasaun.

Viajen sira hanesan ne’e ita bele halo aproveitamentu oinsá bele konvense nasaun dezenvolvidu sira nune’e hametin relasaun di'ak, atu nune’e bele dezenvolve nasaun ne’e iha setór hotu-hotu.

Hahalok sira hanesan ne’e hatudu momoos katak ema hanesan ne’e laiha sentimentu pertense ba rai lulik ne’e, tanba buat di'ak ba povu no nasaun tenke kansela hotu.

 

Rate this item
(0 votes)

Independente Digital TV

Tuir ami iha Twitter

Kalendariu Notisia

« July 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31