Kestaun ne'e, hato'o husi Prezidente AJTL, Zevonia Vierra, iha ambitu komemorasaun loron trajedia Balibo Five ba dala 47no Lansamentu Loron Nasional Liberdade Imprensa dahuluk, iha Postu Administartivu Balibo, Munisipiu Bobonaru.

"Ami hakarak fó parabéns ba jornalista hotu no mídia, tanba ohin loron nuudar loron dahuluk nian ita komemora loron nasional liberdade imprensa iha Balibo, nu’udar fatin trajédia ne’ebé militar Indonezía oho jornalista estranjeiru nain lima, ne’ebé bolu ho naran Balibo Five," dehan nia iha Konferensia Imprensa, iha Postu Administrativu Balibo Vila, domingo ne’e (16/10).

Nia hatutan, durante ne'e  Asosiasaun no jornalisra sira halo diskusaun naran hamutuk ho Konsellu Imprensa hodi deside loron 16 Outubru sai nuudar loron nasional ba liberdade imprensa.

Tanba ne'e, iha komemorasaun ida ne’e, AJTL kontinua hato’o nia pozisaun katak hahú husi harii AJTL iha loron 22 Dezembru 1999 to’o ohin loron kontinua firme hodi promove liberdade imprensa no espresaun iha Timor-Leste, hodi sai baze fundamental husi direitu umanus.

Nia dehan, Asosiasaun jornalisra Timor-Leste orgullu tanba relatoriu husi Report Without Borders Timor-Leste nia liberdade imprensa kontinua hatudu ezemplu diak iha sudeste aziatiku ho rangking ida (1) no iha mundu global kontinua hakat ba rangking 17.

Nune’ e ho komemorasaun ida ne’e, AJTL kontinua husu ba estadu, governu, partidu politiku no instituisaun importante sira seluk hodi kontinua respeita servisu jornalista nian, labele kriminaliza servisu jornalista nian hodi uza kodigu penal, tanba jornalista iha papél importante hodi sai ponte ba entre povu ho estadu hodi informa informasaun sira ne’ebé povu sira hakarak hato’o, no sai kontrol sosial iha sosiedade nia leet.

“Ami hakarak uza biban ida-ne’e hodi  husu ba governu atu respeita servisu jornalista nian, no labele kriminaliza servisu jornalista nian. Nune'e ami husu ba Ministeriu Asuntu Parlamentar no Komunikasaun Sosia, hodi dada hikas kazu jornalista nian iha Tribunal, tanba jornalista laos kriminozu, labele uza podér hodi hamate liberdade imprensa,”nia afirma.

Nia esplika, relasiona ho ezbosu lei sibernétika ne’ebé agora dadauk iha hela Parlamentu Nasional, AJTL husu atu halo diskusaun publiku involve jornalista, akademista no sosiedade sivil sira, atu fó sira nia hanoin, atu nune’e laiha artigu ida ne’ebé bele impede servisu jornalista, sosiedade sivil no akademista nian iha dijital.

Enkuantu, sekarik lei ne’e aprova mós tenke proteje ema hotu nia direitu, laos politiku nain sira nian direitu deit.

"Ohin loron ita moris iha era dijital husu mós ba jornalista sira atu uza dijital ho responsabilidade hodi kontra liafuan odiu, rasizmu no informasaun falsu nune’e ita la halo ema vulneravel atu sai vulneravel liutan, kontinua kumpre kodigu étika jurnalistiku no prinsipiu jurnalismu tanba sai nuudar ukun fuan jornalista nian," nia dehan,

Husu ba Konsellu Imprensa kontinua sosializa lei komunikasaun sosial, no importansia husi servisu jornalista nian ba públiku, nune’e liberdade imprensa kontinua eziste ho diak.

Iha biban ne’e, AJTL mós hakarak fó solidaridade ba maluk jornalista sira iha Mianmar ne’ebé to’o agora hetan risku, ameasa no limitasaun ba liberdade imprensa no espresaun tanba rezime militar iha Mianmar, hodi hamosu violasaun direitu umanus.

Tan ne’e, husu ba estadu Timor atu kontinua aprosima nasaun sira iha sudestae aziatiku hodi respeita liberdade imprensa no espresaun iha Mianmar, tanba iha pasadu ativista no jornalista sira Mianmar mós kontribui sira nia aan ba luta ukun rasik-aan.

"Ami mós fó soliedaridade ba jornalista sira iha Filipina ne’ebé sempre akontese violénsia hasoru jornalista sira, liu-liu foin lalais jornalista Percy Lapid ne’ebé hetan oho, no estadu Timor presiza fó hanoin ba nasaun hirak ne’e atu la akontese tan violénsia hasoru jornalista sira,” afirma nia.

Entretantu, Timor-Leste sai ezemplu diak ba nasaun sira seluk iha sudeste aziatiku oinsa liberdade imprensa ho espresaun iha Timor-Leste lao diak.

"Hamutuk ita kontinua promove liberdade imprensa no espresaun iha Timor-Leste, sai jornalista ne’ebé kritiku liu defende direitu umanus no lian la’ek sira, tanba lia los sei la mate”.