Desizaun rezigna ne’e anunsia liu husi komunikadu imprensa ne’ebé Jornal INDEPENDENTE asesu, Tersa (21/11), horseik.
Iha karta komunikadu ne’e, Prezidente Autoridade (PA) RAEOA-ZEESM, Arsenio Paixão Bano, hamutuk ho adjuntu na’in rua no sekretaria rejional na’in hitu, deside rezigna an.
Iha karta refere, estrutura ne’ebé rezigna an hato’o sira-nia preokupasaun balun no razaun ne’ebé sira iha hodi foti desizaun.
Iha karta ne’e hatete, ekipa ne’ebé lidera husi PA halo komunikasaun dahuluk ho Primeiru Ministru, Kay Rala Xanana Gusmão, iha 1 Jullu 2023, no husi loron ne’ebá kedan autoridade disponibiliza pozisaun PA no membru autoridade hotu, hodi fasilita tranzisaun no fasilita diskusaun no tomada desizaun husi tutela kona-ba futuru lideransa ba RAEOA-ZEESM.
Maske seidauk iha resposta, maibé, ekipa kontinua espresa vontade no interesse ba PM Xanana no ninia ministru hotu-hotu kona-ba vontade PA atu transfere kna’ar tuir dalan ne’ebé loos no permite pasajen testemuñu di’ak, kontinuidade iha implementasaun programa nasional no mós permite futuru administrasaun hala’o kna’ar ho di’ak.
“Atual autoridade hato’o katak autoridade asegura funsionamentu RAEOA no ZEESM-TL durante 120 dias liu tiha tomada posse husi Na’i Primeiru Ministru no ninia nono Governu. Primeiru-Ministru Kay Rala Xanana Gusmão hala’o komprimisu ba povu Timor-Leste tomak katak iha loron 120 nia laran, nia sei aprezenta ba povu Timor-Leste tomak no Atoni sira em espesiál Administrasaun foun ba RAEOA i ZEESM-TL, loron 24 liu tiha data promesa husi Na’i Primeiru Ministru no to’o ohin loron ita sasin katak Na’i Primeiru Ministru seidauk biban atu foti desizaun kona-ba futura lideransa ba Rejiaun Administrativa Espesial Oekusse-Ambeno i Zona Espesial Ekonomia Sosial Merkadu Timor-Leste,” deklara autoridade RAEOA-ZEESM.
Maske PA kompreende no sensibilizadu ba difikuldade ne’ebé tutela hasoru hodi kria konsensu iha koligasaun ne’ebé nia lidera kona-ba futura lideransa RAEOA no ZEESM-TL, komunikadu ne’e hatutan, autoridade hein katak ho autoridade nia desizaun atu rezigna em bloku bele hakmaan PM nia servisu no fasilita konsensu iha koligasaun nia laran no halais prosesu ne’e.
“Desizaun atu rezigna a’an mak desizaun atu ajuda tutela foti desizaun kona-ba futura lideransa, no mós permite futura lideransa estuda no aprende kona-ba orsamentu ne’ebé Governu sentral impõen mai lideransa foun, ne’ebé tuir loloos iha semana oin presiza ba defende orsamentu ne’e iha Parlamentu Nasional.”
Ikus liu, iha karta ne’e, PA autoridade hato’o aiknanoik ida hodi taka deklarasaun rezignasaun husi estrutura autoridade.
“Na’i Prezidente Autoridade empresta alegoria husi Na’i Primeiru Ministru, Kay Rala Xanana Gusmão, no hato’o katak ‘iha dapur, sana lian ona, bee nakali tiha ona, karik ita la tein, dala-ruma bee sei maran, sana sei a’at, ai-maran ita sunu saugate de’it’,” karta ne’e hatete.
